淘寶木製模型

十蚊人民幣都唔洗既木製模型，買左好幾年，砌左少少，而家趁著有時間砌埋佢。

居家減肥計劃

加拿大安省政府日前宣佈進入緊急狀態，叫全部市民如無必要切勿外出。

就是因為如此，原本這個時候我已經開始返我份新工，但現在只能留在家裡。

當初離開香港有一半原因是為了逃避強國政權，以為人到了加拿大便安然無恙，誰料現在他們竟然向全世界輸出病毒，遠到冰島都有人賴野，搞到全球經濟大衰退，連我份工都無埋，真係多得佢唔少。

為了減少外出，現在一天只吃兩餐，當減肥也好，自從辭職之後，沒什麼運動，在家吃完泡麵吃甜品，還有一大堆零食，我的體重升到差不多120磅，現在是時候還債。

一起床在家做一小時的帶氧運動+重力訓練。

韓國鄭多燕的小紅帽系列主要是練下半身，跳半小時Aerobics 已出一身汗，有種錯覺以為自己真的運動了很久。

真正有效的Workout 應該是HIIT，即是 High-intensity interval training，中文是高強度間歇訓練， 用全身的力量，在短時間（三十分鐘左右）做出需要爆發力的動作，並在中間穿插長時間的低強度活動來讓心跳恢復，這種運動方式不但可以幫你在短時間內增加肌肉，同時亦燃燒脂肪。

下面這個是HIIT Workout Video，主要練上半身：

我喜歡這個Channel (Group HIIT)，做完之後真的要狂飲水，做了五日，現在體重下降了三磅，而我目標是減十磅，看來要再堅持多一陣子。

講真，我不是追求極瘦身材，但也不想看見自己再肥下去，人老了，身體基礎代謝率會下降，以前讀中學時食足五餐都不會肥，現在多吃一口雪糕都不敢，現在不能不減。

High Maintenance的朋友

今個星期有一個朋友Unfriend我，我突然覺得鬆左一口氣。

為什麼？

事關這位朋友實在太喜歡Attention seeking，一日在臉書發四五個Post，而她對於朋友的定義是，要時時刻刻都Like她的Post，留言之後一定要繼續覆下去，而且一定要回覆她每個Whatapps，如果你達不到她的要求，她就會覺得你不珍惜大家的關係，挑戰她底線，接著大發脾氣，以後你找她，她也不會回應你，然後她會在自己臉書裡發一些所謂朋友原來都是Bitch的Post，繼續Passive Aggressive 地攻擊你。

我已經覺得很無聊，不勝其煩。

可能我份人比較摺，閒時只喜歡研究自己有興趣的事物：政治歷史，心理學，自學一些技術性題目，例如電腦編程，金融投資，基本上不會把精力放在社交媒體上面。雖然我偶爾也會分享笑話和新聞，間中在別人的Post下面留言，但這些從來都不是我生活的重點。

人家回不回我的Post，有什麼所謂?為什麼我要把自己的快樂(情緒)寄托在別人的反應上呢? 這就是社交媒體的弊病，每個人都依賴有幾多人讚好自己的Post 來定義自我價值，成件事完全是錯哂。

由於我不看重這些芝麻小事，所以我也沒有常常回應她的Post，由此她便對我生氣。她不明白的是，我是一個很需要私人空間的人，大家的生活需求根本不一樣。

不過說到底，這位朋友其實給我感覺思想比較膚淺簡單，大家價值觀出入比較大，令我覺得大家不是同一個世界的人，才是令我跟她疏遠的真正原因。大家之間其實根本沒什麼話題，所以也不覺得大家非常熟，自然把她歸類為普通朋友。既然只是普通朋友，我也不會常常想與她分享生活或心事，偶爾聊個天就算。

她也比較自我中心，我試過和她分享煩惱，她會直接Give me a lesson，但其實根本完全不明白我的想法和考慮，那些所謂Advice完全是香港TVB式的空洞廢話，什麼明天會更好，做人要知足，簡直On9到無朋友，所以我後來什麼也不多說，我不想用層次不同來形容，但明顯大家Connect不到。

如果身邊有一個人這麼情緒化，對朋友要求那麼高，為人那麼High Maintenance，我更不想靠近。我最討厭別人無故對我很高Expectation 的感覺，不喜歡對方認為我有Obligation去照顧她們一切情緒需要，一哭二鬧三上吊的女人最麻撚煩。

其實這位小姐已經不是第一次用Quit the relationship的方法來解決人際關係的問題，以前她也曾經跟我投訴過自己的朋友怎樣不好，然後乾脆不再來往，Leave what-apps group，那時我已經有預感這一天會發生在我身上，一個人的行為模式是有連貫性的，她可以對其他人這樣做，對我也可以一樣。

所以今次發生這件事，我一點也不覺得驚訝。

又這樣說，我以前也遇過類似的人，還不止一個，所以很清楚這種人在想什麼，而我是絕對不會被這種人威脅到。

相信她很快便會重新Loop她的交友Mode，不停地識新朋友，不停示好，完全不了解別人的需要，然後發現對方不符合自己期望便馬上絕交，之後又去尋找新的圈子，重覆人生悲劇。

蠢人真係好慘，成日好似Running Wheel 上面既白老鼠咁，係咁跑係咁跑，永遠都唔知自己做緊乜。Always repeat the same actions but to expect a different result

青瓜味薯片

呢隻薯片真係好好味，口感非常特別，就算而家因為肺炎搞到就快世界末日咁，我都覺得此生無憾。

但好奇怪，青瓜味薯片係北美係無得賣，我只可以在華人超市搵到，以前係香港已經食上癮，黎到加拿大仍然好掛住，價錢比本地薯片貴少少，4蚊加幣左右，即係24蚊港紙。

除左青瓜味，佢仲有意大利肉醬意粉味，四川燒烤味，同埋榴槤味，男友見到覺得好surprised，佢話估唔到薯片可以有咁多古靈精怪既味道。

我話，你地本地人食野其實好保守，接受唔到新口味，食黎食去都係BBQ , Salt & Vinegar, Tomato。

佢都表示認同，畢竟亞洲人口多，市場大，商品選擇比較多元化，成日有好多未見過既新產品推出，呢樣野由四年前已經講左好耐，去到近呢一年我先開始唔再比較兩邊既食品選擇。可能覺得再Complain 都無用，默默接受左呢邊就係悶。

其實如果唔係要諗計係呢邊搵錢謀生，純粹過生活，我都接受到，係冬天長左少少，凍左少少，出街食飯無咁方便，同埋成日見唔到朋友，其他都還好，畢竟我係宅女，都唔鐘意成日出去。

不過如果第時真係要退休，首選都唔會係多倫多。

識揀一定係揀東南亞，台灣都可以架，生活成本低，野又好食，當地居民又Nice，夫復何求。

INFJ - 才女性格

INFJ，好多作家都係呢種人格，香港例子有黃迪詩、亦舒。另外前港姐／政治家袁彌明都屬於呢TYPE，雖然她只寫專欄。

英國例子有Jane Austen (傲慢與偏見的作者)

NF 屬性令佢地對人性觀察力強，有好多深刻前衛既想法，不屑庸俗膚淺的行為，最討厭人云亦云。

J 屬性既人鐘意批判思考，所以佢地表達時一針見血，同時鐘意馬上付諸行動。

而作家通常需要獨處思考先可以寫到作品，I 屬性鐘意離群索居，有自己私人空間，所以我幾肯定上面既人全部都係INFJ　（相反，ENFJ 一般鐘意講野多過寫野）　

另外INFJ 人不主動撩是鬥非，但你得罪她，她勢必還擊，自我非常堅定，亦會捍衛自己既觀點，這點和INFP 不同，INFP 不太鐘意衝突，通常會由得佢，廢事浪費時間同對方嘈。

INFJ型女性通常比較難搵到伴侶，唔係佢地條件唔好，岩岩相反，佢地本身有能力，又有太多自己想法，如果加上外表唔差（例如黃迪詩咁），就會變相對伴侶既要求好高，終生未婚的例子比比皆是。

點高法？對方首先要係精神上滿足到佢地，欣賞到佢地既優點同個性，同時經濟能力又不可以太差。

問題是，社會上好多搵到錢的男人，都係屬於I/ESTJ類型，佢地做事講求邏輯、理性和效率，關注事實表面，不會太鐘意探索深刻思想，通常佢地收左工最鐘意就係打機，睇波，研究汽車，電腦，手機，發展一些非常男人的興趣，他們未必對人性有什麼觀察，更不懂得欣賞INFJ 型常常思考的抽象道理，對他們來說，INFJ 就是吃飽飯無事做想太多。

如果I/ESTJ 人有一日開始反思人生，通常是他們突然遭遇什麼變卦或意外才會這樣，又或者人到中年，經歷得多，知道任何事都不是必然的，他們才會開始想了解INFJ 的話題。但到了這種年紀一般都已經結婚生子有家室，所以很難跟INFJ 在一起。

至於在精神上有極高追求的男人，好多時都係文藝路線，即係NF型，收入可能極不穩定，某程度又非常理想主義，在INFJ 眼中可能比較幼稚，看不上眼，起碼要等到佢地三十到四十歲左右先會大器晚成，到時睇下大家有無緣份。

隨著年紀漸長，對象選擇愈來愈少，如果INFJ 唔肯妥協，最後一直單身或晚婚都不出奇。

不過INFJ如此有才華，加上天生聰明，即使時間磋跎，她們最後找到的對象一般都是非常適合自己的人。

為什麼我不跟本地人做朋友?

我不喜歡跟加拿大本土年輕人當朋友，就算同齡人也只是勉強交談，基本上我是避免和他們深交，為什麼？

一來沒有共同話題，但就算是有一點，只要一深入交往，你便會發現對方比起亞洲人難相處，而且在人際關係上表現得非常幼稚和自我中心。

為了避免他們以為我是他們的奴隸，可以任勞任怨，我通常是保持一定距離。例如他們主動找我，我會偶然才回一兩句，假裝友好，或者他們發神經時，我都會不作聲當看不到。

一旦他們知道你在乎大家的關係，便會中二病上身，任意把自己的期望放在你身上，不斷Message你，不停說自己的事，當你有自己的事要忙時，他們會認為你不夠重視他們，說很多很難聽的話。

廿七八歲人仍然好似小朋友咁要身邊人不斷關注自己，把自己生日放到無限大，你如果不當是一回事，佢就會無啦啦發脾氣。但你明明跟對方都未必很熟，一年只是見一兩次，所謂Attention Seeking Whore，諗起都得人驚，完全覺得莫名其妙。

這些人總是欺善怕惡，喜歡找溫和善良的人當朋友，然後只要稍為對他們好一點，他們便開始當你們是他父母，可以容許他們耍任性，當你向他們兇一點，或者你有很高的利用價值，不得不求你，他們便會表現得像隻聽話的小狗。

我稱呢種為乞兒性格，又稱犯賤。

況且，越是喜歡迫我的人，我越不會理他們，這輩子最討厭有人想控制我，我是一個受軟不受硬的人，而且我在香港認識了廿多年的朋友，全部十幾二十歲便認識，大家出生入死，經歷甚多，像家人一樣，他們都不會張牙舞爪要求我怎樣怎樣，你們這群人算老幾呢？

我們亞洲人講求互相尊重，思考一件事時，一定要考慮大家的共同利益，但英美人完全沒有這樣的觀念。

他們真的很奇怪，剛認識時道貌岸然，表現到非常獨立成熟，但跟你熟了之後，像個任性的小孩百般要求，這時候我真的想說一句：I don't really give a shit to you guys. Leave me alone please.

由於文化和家庭原因，在香港，我很多時需要得到其他人的幫助才生存下去，根本沒辦法學像他們那麼養尊處優，自尊自戀，自私自利，認為自己是世界的中心，一旦你不是這樣想，相處時便會處於弱勢，所以我一直不喜歡加拿大的同輩，雙方像是活在兩個星球的生物般。

難怪他們平時也會抱怨自己沒有長久的人際關係，朋友總是換完一班又一班，每次剛開始做朋友時都是好地地，日子久了大家就開始爭吵，最後不歡而散。沒辦法，對於一堆極度自戀的人來說，他人即地獄，當你沒法犧牲自己半點利益去妥協和包容對方時，兩者又如何相處？從來不會欣賞別人，十句有十句都是談論自己，你為什麼不對著鏡子跟自己說話算了？

他們的人生注定是孤獨的，因為根本看不清自己的問題，往往只會怪罪他人、怪責世界。

而我也沒興趣跟自我認知程度低的蠢人做朋友。

所以一般來說，我更喜歡和其他加拿大老年人相處，Babyboomers不是成長於物質相對富裕的年代，知道生活艱難，不會覺得一切是那麼理所當然，待人接物也懂得感恩和付出，同理心較強，和他們聊天是比較舒服的。

至於日常生活，我傾向和其他移民聊天，中國人也好，伊朗，東歐，南美，非洲都是非常好相處的人，大家都是移民面對的難題也是差不多，所以有很多共通話題，他們也懂得互相尊重，禮尚往來。

幸福使人膚淺，痛苦令人深刻，由發展中國家來的人，對生活的體悟，跟本地人完全不一樣，起碼知道個世界上其他地方發生緊咩事先，唔係下下講自己幾時生日。跟他們聊天，輕鬆好多。

憶苦思甜

肺炎殺到黎多倫多社區，而家開始要減少出街食。

男友是半唐蕃，煮西餐叻過我，呢餐由佢負責。

是日晚餐：橄欖油黑醋蕃茄生菜沙律，蘑菇肉醬意大利粉

每個人十五蚊港紙，已經飽到食唔落，要留第二餐。

加拿大雖然好多野真係好On9，但無可否認生活成本真係平過香港好多，只要你唔出去食，留係屋企煮，仲要餐餐豐富，飽到你食唔落，平均每個人既花費只需要一千二百蚊港紙。

呢個時候，你可能會話，車，你係香港落街市買自己煮都係呢個價啦。

但係呢邊既後生仔只要讀完大學，唔係乞食科畢業，專心做兩三年野，唔係周圍旅行Gap year，一般都會有三萬蚊港紙，到左三十歲時，一般都有四至五萬一個月，如果係專業人士，例如搞IT，搞金融，賺得仲多。

買屋無香港咁貴，食野又咁平，只要唔大洗，其實儲到好多錢，想係五十歲前提早退休其實唔難。

當然好多鬼佬慣左今朝有酒今朝醉，完全唔識理財，白白浪費左呢個難得機會。

難為亞洲Ｄ後生仔由細到捱生捱死，讀書考試幾辛苦先有個大學學位，出到黎仲要同Ｎ個人競爭一個 Low-end position，比人壓價之餘過住有返工無放工既奴隸生活，就算幾精打細算都無辦法買樓結婚生仔，做香港人真係好慘。

即係講緊以前既我。

所以我真係諗都無諗過自己會有一日過住而家咁既生活。

以前係香港一個人住時，食野真係好求其，係個劏房煮個麵，碌個烏冬就算，有時會係百佳買PACK 好哂既餸炒兩炒，煲一煲飯又一餐，由於細到無位放雪櫃，所以唔可以留過夜，唔可以帶飯返工。

好多時放工就係公司飯堂食，廿蚊叉燒飯，廿五蚊兩餸一湯，有得食已經好感恩，食完好快趣返屋企沖涼訓覺。

一係返到屋企樓下食越南粉，有特價，三十五蚊一碗，或者去爭鮮排隊買八舊壽司又一餐。

再唔係食老麥，果陣買左份三號脆香雞翼餐，或者八號芝士漢堡餐已經好開心。

總之平均每月唔可以洗多過三千蚊係食飯度，如果唔係就儲唔到錢買樓，買唔到樓就要一世住劏房，諗起都驚。

男友知道我以前過著Ｄ咁既生活真係聽到O左咀，後來跟我返香港探親時，我特登帶左佢去我以前食開既鋪頭（全部都係舊區）回憶當年，佢忍唔住講左句，好彩你賭一鋪黎左加拿大生活。

關閉設施後的第一個周日

加拿大政府呢兩日終於宣佈關閉大部份公共設施，可能因為總理杜魯多既老婆中左招，佢先開始識驚。

我地住既公寓都關閉哂泳池和健身室，而家要做運動只可以留係屋企。

本來想出去食壽司，但係怕增加感染機會，唯有留係屋企煮野食。

最近係網上學識左煮香港譚仔米線。

真係好容易，肥牛片，生菜，加豆瓣醬，加兩匙白醋，加少少花椒，即變酸辣肥牛米線。

一路食一路上網睇返以前係香港做野無時間睇既TVB 劇集，好耐無試過咁HEA。

突然醒起有事要去圖書館，點知發覺門都唔開，起碼要等到四月中。

可能驚有社區爆發既危險。

行去附近超市，見到有紅莓黑莓做緊特價，12蚊港幣一盒，順便買左兩盒。

武漢肺炎終於來到加拿大

加拿大做咩事都慢人一拍，一個月前仲係度笑亞洲人去超市排長龍搶口罩，搶消毒洗手液，搶廁紙食品日用品，而家終於輪到佢地自己做埋同一樣野。

不過本地人本來就有囤貨既習慣，因為唔係成日有得去超市，通常一出去就買哂一星期就食既野，而家大條道理繼續囤多Ｄ。

回想起以前係香港住，行落街就係超市，每次買雞蛋買四隻已經覺得好多，而家真係兩種生活。

但呢班人仍然堅持唔帶口罩。

我都唔知話佢地天真定勇敢好。

後日我就返新工啦，又要搭電車同地鐵，其實我好想帶口罩，但又好驚比痴線佬打。

講真，雖然種族歧視係唔需要理由，想搵機會打柒你就打柒你，不過我覺得帶左又好似異類。

以為西人超市先係最多人去搶野食，點知唐人超市一樣。問題係佢地買果Ｄ係新鮮蔬菜肉類，擺得幾耐？

因為大家都開始搶物資，可能有人拎住枝槍周圍搶劫，加拿大人又開始去買槍買子彈保護自己。

生活係北美真係好似自生自滅咁，有事唔好旨意警察保謢到你，事關報得警黎，你已經無左條命，好多野都要自求多福，另外警察好多時都會話拉唔倒，就算拉左都未必重判。

西方人講究自由，你有自由，人地都有自由，人人都可以做自己想做既野，於是變左無王管既狀態，想要有秩序既生活，都係留返係亞洲好。

厚顏無恥既人

話時話，最近網上睇到一個個案，比我之前遇過既事更離譜，原來呢個世界厚顏無恥既人多的是。

樓主的親戚總共一家四口，想移民到美國，未到達前已經開口要求話要係佢地屋企住兩個月先，慢慢睇樓搵屋，樓主勉強答應，反正只係兩個月，算鳩數。點知親戚臨出發前又改口吻，話不如住足半年睇定先啦，到時再決定留唔留低，如果到時唔惦再睇下返唔返香港，等佢老公可以做太空人兩邊飛，同時又唔洗簽死一年租約。

既可以慳錢，老婆仔女三餐都有人照顧，一個唔對路又隨時可以返香港，一次滿足哂三個願望。

 又一個Take it for granted 的例子。

係既，你係滿足哂自己既願望，但係At the expense of other people果種，你只係將自己移民需要付出既成本轉移去你既親人身上。樓主本身已經住左一家四口，如果要招呼埋佢親戚，就變左一家八口，佢將會失去成個家庭既既日常生活。

我唔係一個冷漠既人，朋友有事，我都係第一時間幫得就幫，當然係能力範圍之內。

但點解我對呢Ｄ人咁反感？

因為佢地完全唔理自己為人地帶來乜野麻煩。

一）侍著大家一場親戚，覺得打擾人地生活半年都無問題

二）打擾完都算，又唔提比返幾多租金人地

三）呢Ｄ貪得無厭既騙徒通常有個共通點：就係一開始就話住幾日就走，哄你答應，然後住下住下就唔走，各種理由，愈住愈長，博你唔好意思出聲，然後繼續佔便宜。

四）住耐左，主人家覺得唔方便，到時想趕你又唔係，唔趕又影響到自己生活，最後一開聲，通常都係不愉快收場。

五）如果佢地無打算獨立既意識，住得係度，自然會有其他野又要搵人幫，對方幫得一樣，之後又會有第二樣，人地只要唔幫其中一樣，佢地又會覺得被冒犯，然後又要怪人。

對呢Ｄ人黎講，我地既存在價值就只係被利用，一旦無哂利用價值，就再無Keep relationship既必要。

雖說人性本來醜陋，只是想不到移民後見識更多。

新移民的「受害者情意結」

上篇講起依賴心態，令我想起其中一樣係加拿大觀察到既野。

好多新移民有「受害者情意結」，覺得自己係新來，岩岩來到乜都唔識，好不容易先離鄉別井，無人幫好慘，所以我弱我有理，你地唔幫佢就係衰人。

問題係，無人迫你移民來。你話你走難就唔同，做難民真係無得揀，個國家打緊仗根本返唔到去，呢Ｄ人就真係被迫留係度，堅係慘。

透過正常途徑移民，通常都係得幾種：婚姻移民，技術移民，投資移民，三種都係自願。移之前係咪應該自己做足心理和財政上的準備？

有些香港人，平時去旅行飲飲食食，乜野機票酒店都BOOK好哂，咩行程都安排到，識得放上FACEBOOK/ IG 曬命。但一講到移民，唔知點解個思維好似返左去八九十年代咁，明明而家互聯網發達，一早租定AIRBNB並唔難，當地亦有很多租屋網，歡迎長短租，選擇也很多。但佢地完全無計劃利用這些資訊，完全沒有研究過要買／租什麼房子，在哪裡住下來，淨係諗住投靠當地親友，有乜事都係去到當地先慢慢搞，又不會查下當地生活成本要幾多，唔諗住做Research，大條道理住係對方屋企，要人車出車入，無諗過幫手做家務，好似完全失去哂自理能力咁。

你既朋友當初又何嘗唔係新移民？唔通佢地又有朋友係度借屋佢住？係咪你朋友唔係度就唔移民黎？美加都是移民社會，有幾個黎到落地生根之前已經識人係呢邊生活？

係，你係好慘，但人地都有自己的難處，係咪人地滿足唔到你的要求就要發難渣呢？

但係呢Ｄ人係唔會咁諗。

佢地平時在香港受太多照顧，養尊處優，一開口求助，屋企人朋友親戚紛紛幫手，黎到加拿大，改變不到自己的香港Mode，繼續張手就來，覺得別人的付出都是理所當然，三十幾歲人都仲係典型港孩思維。永遠覺得自己既利益先係最重要，你既利益係可以被犧牲。

你唔單止唔可以唔幫佢地，仲一定要用佢要求既形式幫，唔可以有自己意見和想法，唔可以保障自己利益，否則你就是背叛佢。點解佢可以咁諗？因為佢覺得全世界都係佢既Slave，你地都係低佢一等，佢肯願意同你做朋友，搵你幫手，係你既榮幸，你竟然唔珍惜？咁就唔好怪佢同你斷絕關係。

呢Ｄ人最有趣既地方係，原來移民黎既時候，公司已經比左租屋津貼佢地，但係佢地一蚊都唔想比，所以先住朋友度。

講到自己係受害者咁，根本孤寒人地，闊佬自己，以小換大，著數攞盡。

移民前要調整的心態

移民美加前，有一樣野好緊要，就係要調整你的心態。

_{唔好諗住依賴任何人，包括當地的朋友，親戚，伴侶。}

_{北美文化比華人文化更重視個人既獨立性，對方幫你係人情，唔幫係道理，唔好諗住大家係一場朋友或親戚，就用血緣關係／感情道德去綁架對方，覺得人地係有義務為你做任何事。}

_{選擇幫不幫你，在什麼層面幫你，幫多少，什麼時候幫，都是對方的自由。}

_{千萬不要見到別人幫你一個小忙，便覺得雙方已經係熟人MODE，然後獅子開大口向對方要求更多，而人地唔肯就嬲左人。}

_{在北美，每個人都是獨立的個體，朋友之間盡量都不會涉及太多金錢來往，也不會太強調要對方承擔什麼義務和責任才稱得上好朋友。}

_{大家有共同興趣和話題，可以一起出去進行某些活動，就算是朋友。}

_{如果你自己有什麼個人困難，最好自己解決，不要理所當然地去麻煩你的朋友。}

_{就算你要求助，都最好自己先努力盡一部份的責任，才向對方請教，千萬不能做伸手黨，期望別人白白為你解決問題。}

_{比方說，你不懂報稅，最好先自己研究一下有關法律和稅務系統，想到有什麼問題才問人家。}可是很多新移民會這樣說：「我不會報稅，你能幫我嗎？頂多請你吃個飯！」

_{要是別人不幫，他們便馬上不來往，從此斷定大家不是朋友關係：}

_{—明明我都說請你吃個飯，那麼小的事都不願意幫，你這個人根本不靠譜，我還跟你做朋友幹嘛？你簡直無情無義。}

_{—你移民過來這麼久，都報了這麼多年稅，一定很熟悉，為什麼還不願意幫這個忙？}

—只是因為我們是新來的才什麼也不懂，你以為我們很想找你幫忙嗎？不幫就拉倒！

_{有很多人投訴自己的朋友親戚移民後都變得冷漠，好像只顧自己的生活和利益，完全不重視人情味。}

_{問題是，很多人當初移民來的時候，都是靠自己一手一腳解決問題，過好自己的生活。不是說不幫你，但是如果你有強烈的依賴心態，一心打算投靠別人才移民過來，人家又能幫你多久？}

很多時老移民甚至已經來了很多年，根本不熟悉新移民的困境，沒什麼可以幫上忙，你也不能怪別人。

你可以向人請教，我相信很多人願意分享經驗，但不見得人人都必須要參與你的事務才顯得大家的關係夠好。

可能我自小在香港時已經習慣一個人生活，沒有家人，所以剛剛來到時，即使別人只是幫我一個小忙，我也是感激不盡，想辦法回報，而不是抱怨別人為什麼沒有Take care 自己的生活。是的，我是什麼也不知道，但我也需要盡自己能力去解決，而不是指望其他人。

如果想這邊的人幫助自己，首先要學會付出，不要讓人覺得你是Free loader，你要先踏出第一步，人家才會有可能Meet you in the half way，因為在這裡，Respect needs to be earned。

我不評論這種文化好還是不好，也不跟東亞的集體主義文化比較，因為各有特色，各有好處壞處。但加拿大就是行這樣的法則，自己要入鄉隨俗。

在加拿大面試

最近兩星期都忙著Interview，寫好了的稿背完又背，改了又改，基本上沒有好好休息，從上個月15號開始發CV，到今天11號，現在已經有一個OFFER在手，算是了結一件心事。

說起見工，那並不是我的拿手好戲，在香港時幾乎是面試白痴，大學室友十九歲時已經知道大部份面試題目的標準答案，例如有很多情景題：你怎樣處理一個麻煩同事? 你怎樣解決困難？和別人意見不一致時會怎樣？萬事都離不開溝通兩個字。

但我已經工作多年，仍然轉數奇慢，找不到面試的要訣，這方面我確是晚熟，但有人又居然願意給機會我，真係執到。

可是今年不一樣，自從決心從上一家公司辭職之後，我開始思考自己應否回香港工作。畢竟前公司的環境十分Toxic，很多人都自私傲慢無禮+種族歧視，對我心理做成巨大陰影。

只是一想到肺炎，一想到黑警，一想到愈來愈高的樓價，我還是有所猶豫，覺得不如再試試看找別的公司吧，不然以後回港會後悔。

很多事情原來只要你願意踏出第一步，之後便會做得愈來愈好。

英文是我的短板，對於非英語母語者來說，面試的最大障礙是聽不清錯對方的問題，而不是不知道如何回答。

那怎麼辦？

別無他法，上網閱讀面試題目一百條囉，再寫出自己的答案，慢慢分析，反覆練習，我就不信你答不出來。

我甚至製作了一系列卡片，放進百寶箱裡，抽中哪條答哪條。

英文水平，短期內不可馬上提升。

文化問題，需要時間適應。

臨場反應，需要經驗累積。

死記硬背，是我們唯一可以下的苦功。

第一二三個因素在現階段並不可控，但是如果連一般Behavior questions也答不出，就是你不夠努力的問題了，能怪誰呢？

馬死落地行，我們中國人有的是勤勞特質。

今天終於完成了兩個面試，又成功答解了百分之八十的題目，付出總算有所回報。

男友說比起兩年前我第一次Phone Interview，今次表現進步了很多。

想當年第一次接到Call，因為聽不清楚題目被HR 罵，準備了三天的面試就此泡湯。

現在總算有志者事竟成。

就算最後沒有錄取，也是一個很好的練習。

那些年我聽過的打工故事(二)

第二個故事發生係加拿大。

話說朋友B係東北人，畢業後搵唔到工，唯有搵住文職先，在同學介紹下，佢幫一家移民中介公司做行政助理，談好是最低工資，但係佢地之間並無簽任何合同，以佣金形式出糧，即是說他們在法律上並不是正式的僱傭關係，換言之，朋友B 並不會有任何勞動保障，當然他自己同時也不用報稅。

同時間，老板訂了一個規矩：做錯事要扣錢。

問題來了，到底做錯什麼事要開罰呢？不同類型的錯誤又要罰多少錢呢？這些都沒有一定準則，全看老板心情。

朋友B 的工作主要是核對客人個人信息，幫忙收集移民申請個案所需的文件，填好表格，交給老板再檢查，然後寄到政府。

老板隨便發現一個TYPO，即開罰二百加元，相當於10%人工。

如是者朋友B 幾乎每個月拿著比最低工還要低的薪水在加拿大生活，好彩佢住既城市生活成本低，租屋也不貴，否則恐怕儲不到什麼錢。

最離譜的一次是，朋友B要請兩星期假返屋企探親，搵左朋友C去幫手頂替，朋友C 每次跟完一個移民個案，都將客戶人名寫進EXCEL FILE，好讓朋友B 回來跟進，另一方面是保障自己，列明什麼個案才是自己經手的，即使以後出了問題也有證據說明。

朋友B 回來後一切安然無恙，大家開開心心說再見，該發的薪水也發了。

誰料一個月後老板說，有些個案填錯了信息，他認為是朋友C 經手的，但要在朋友B 的薪水克扣三百加元。

朋友C 聽到當然忿忿不平，跟朋友B說：

首先，如果你跟我說一開始這個工作做錯事要扣薪水，我一定不會接，因為我只是來頂替，難免會犯錯，這樣對你我也不好，誰知道他接自己喜好要扣多少？

第二，如果他那麼在意我是否犯錯，為什麼他不在我離職前檢查清楚手頭上的文件有沒有錯誤？有的話，他應該扣我的薪水，而不是你的。現在我已經離開了一個月，死無對證，他隨便找個錯處都可以說是我做的，然後扣你的錢。

第三，請你查看一下我留給你的Excel名單，上面到底有沒有他所說的客戶？如果沒有，證明那些文件根本與我無關，他只是想找個理由扣你的錢，給公司省成本。

後來朋友B 才發現自己被騙了，無奈自己英文水平不夠高，所以暫時找不到本地公司，但經此教訓，以後也不敢跟華人老板搵食。

講真，係香港，根據勞工法例，做錯事打爛野，最多只能要求賠三百元港紙。呢種老板隨隨便便就扣人一星期薪水，真係刻薄到唔刻薄，完全唔尊重員工。

但無計，如果人在國外，無一技之長，語言能力又唔強，就業選擇自然少，遇上賤人的機會便愈大。

那些年我聽過的打工故事(一)

第一個故事發生在愛爾蘭，話說朋友A自台灣碩士畢業，文化界書生一名，飛到都柏林Working Holiday，白天上英文課，下班去香港人或大陸人開的餐館打工。試工數天沒有薪水，小事。他擔當收銀的職位，每晚都要人手點算當日到底收了多少錢，第一天老板說收銀機少了錢，要在他的薪水克扣，他只好怪自己不爭氣，一時大意點算錯誤，畢竟剛剛開始上班嘛，後來老板每晚都說收銀機少了錢，他不明所以，明明已經點了四次，數目還是有誤差，為什麼會這樣？　

兩個月過後才發現，收錯錢是假的，餐廳只是想從他身上省錢，這時朋友馬上執包袱走人。可是他已經當了人家的廉價奴工。

你可能會問，為什麼我朋友兩個月才知道自己被搵笨？是不是要去驗腦？

我告訴你，這件事無關他本人智商，因為他生平從沒有遇過這種事，作為一個白領，平時都在大學或辦公室工作，人人做事規範守法，在他的認知範圍內，沒有人會用這種方法謀利，但一出到國外，你幫餐廳打工，跟你相處的不一定都是知識分子，很多都只是十多歲便偷渡出來打黑工的低下階層，對方用什麼手段生存，很可能都超出你想像之外。

在Working Holiday 發生這種事可以當買個教訓，當是一種經歷，回國後跟朋友分享回味，但如果一輩子都非得留在這種環境生活，恐怕並非人人所樂意。

幫華人老板打工

有很多人說移民到加拿大，你可以不懂英文，因為多倫多和溫哥華基本上是一個華人城市，你就算只在華人圈打工也能生存。

是的，可以這麼說，那麼跟華人老板上班，到底跟其他主流本地公司上班有什麼分別呢？

首先大家要了解，什麼人會在華人公司工作。

答案就是英文不夠好，不想融入主流的人。

這班人在加拿大的職場上算是競爭力較弱的一群。

因此很多華人老板看中這一點，把勞動條件設定得非常刻薄：先試工三天至兩星期不等，期間完全沒有薪水，美其名Training，然後找個理由拒絕你，或者開始上班後，用各種理由克扣薪水。

他們完全不會怕你辭職不做，因為勞動力總是供過於求：每年新來的留學生，Working Holiday的年青人，在家沒事幹出來找兼職的華人婦女，還有一堆不知用什麼方法來到加拿大搵食的大陸黑工。

一個走了，大不了請另一個。

有時不止是最低工資，就算不給你underpaid已經偷笑。

公平地說，並非每個華人老板也是這樣，自己小心留意便好。

至於正式的西人公司，因為怕惹上官非，絕對不敢這樣做。

加拿大職場相對簡單?

很多人說在加拿大工作，人人互相尊重，職場人際關係相對比香港簡單。我聽了第一時間心諗，下？你生活在加拿大哪一個地區呀？這些人是不是因為自身太幸運，所以以為自己的經歷就代表了整個加拿大？

由於我不是移民中介，所以我從來不會以糖衣包裝 任何有關加拿大的事物，閣下愛看便看，如果想看正能量移民Blog / Facebook page，請稍移玉步。

加拿大其實分很多不同部分，光是小城市和大城市的文化氛圍已經不一樣，小城市人人有禮善良，大城市戾氣重重，人口組成部份複雜，勾心鬥角嚴重，人與人之間信任度低。

你的城市＞你的行業＞你的公司＞你的部門＞你的老板的管理風格，才是決定你的職場生態環境的因素。

多倫多，移民多，大城市，個個爭住搵食，你說錯一句話，開錯一句玩笑，對方當時笑笑口不表示什麼，但轉個頭馬上向老板/ HR 投訴的事情多的是。不少人為了顯示自己的強勢，言談間總是需要貶低他人才有安全感，上班第一天便已得罪很多同事，你要跟這種人合作做事，除了忍，別無他法，如果你刻意對抗，對方只會變本加厲。

假如你又是做金融投資有關的產業，裡面的辦公室政治比哪裡都嚴重，性格稍為溫和的人，將會成為眾矢之的，第一個被欺凌被孤立，再被開除。

你的部門，如果是Cost Centre還好，大多是朝9晚5的Routine work，雖然一世人流流長，總會遇上幾個賤人，頂多有空過來寸你兩句，平時見到面不打招呼，無故玩小圈子，當你透明。如果是Revenue Centre，大家為了爭上位，什麼骯髒手段都用上，擦鞋，說謊，出賣同事都只是基本的，跟香港比起來實在有過之而無不及，世上無淨土，加拿大也不會是天堂。

至於你的老板，這個不多說了，好工不如好老細，好上司永遠都是難求，放諸四海皆是，如果同事好但你老板仆街，而你公司又容許這種仆街存在，請閣下早日另謀出路。

都係果句，好公司不是沒有，但要看個人運氣，哪裡生活都有其困難之處。

INTP - 與世隔絕的哲學家

52歲露宿者：無錢也能過活是一種成就

我幾乎都幾肯定呢個人性格係INTP。

I 代表內向性格，係因為佢鐘意一個人。

N代表佢對世俗既野無興趣，但對精神層面有極大追求，見佢無樓住訓街食M記都無所謂，但要成日都去圖書館就知。

至於T代表佢既情感需求低，因為唔需要同人建立連結，唔在意他人睇法，而思考上有自己一套邏輯，IQ唔會太低，呢位先生起碼都有個化學Degree，大家需知道要係幾十年前既香港考入大學都唔係易事。

P就係過著隨意既人生，對計劃和規則完全無感。

NT型性格又歸為理性者，呢類人對知識非常好奇，好多INTP人多數過著好隨意既日子，對名利無咩感覺，但就好鐘意讀書，基本上係學校成績唔會太差，但亦唔會最TOP (因為唔係Ｊ型性格，所以唔鐘意按時間表溫書，佢地完全係考天才，）

題外話，我發現係香港，好多人唔再玩呢個「返工儲錢向上流」既遊戲，只要你唔介意一世同屋企人住，唔諗溝女，唔諗結婚生仔，成家立室，就連工都唔洗返，咩職場競爭，點樣諗計哄老板，全部唔關你事。

點解啲失業拎可以幾年唔返工

移民後最好避開中國人？

遇過好些剛剛從香港來的新移民，通常對大陸人有很多不滿，又非常嫌棄所有與香港有關既事物，他們總是口口聲聲說要搬到遠離中國人的地方，最好只跟本地人來往，但是幾年過後，還是回到華人圈子較多。

為什麼？因為本地人的圈子不是你說融入便融入，而且組成加拿大人的族群，並不只有土生白人，而是由各個民族的人組成，歐洲，南美，中東，印度，南亞(印尼、菲律賓、巴基斯坦)，東亞(中日韓台、馬來西亞、新加坡) ，每個GROUP各有自己的文化和語言，他們對同一事物的看法和價值觀可以完全唔同，而你對其他國家的文化有多了解？

如果你是指希望跟土生加拿大白人來往，首先你要懂得對方的話題，例如冰上曲棍球、酒吧文化，你有沒有興趣去知道？人家從小到大喜歡的電視節目、當地知名人物、明星，你能說出個一二嗎？除非你本身在那邊長大，或者自細已經對北美文化十分嚮往，否則真的很難搭訕。

宥時莫說是FOB (Fresh off the boat，意指剛下船的新移民)，就連一些ABC, CBC 也不一定熟悉這些話題，事關很多華人二代雖然英文流利，但他們的家人只生活在華人圈裡面，特別是那些有一大群親戚在這邊落地生根的大家族，每逢周末就是相約飲茶，在屋企就是打邊爐看TVB，假日就飛返香港探親，你問他們對白人文化有多了解，他們也可能答不出。

不是討厭中國人和中共政府，就代表北美一定適合自己。

當年香港人只想找個地方避難，而幻想到外國像天堂一樣美好，到頭來卻十分失望，發現加拿大基建落後，政府效率低，抱怨鬼佬思維不及華人靈活，加上種族歧視、找工作不順，在日積月累的情緒下，認為所謂自由民主的制度也不過如此，隨著中國經濟愈來愈好，他們便開始幻想只要回到中國生活，一切便會很完美，於是看到香港年輕人出來示威，便顯得十分不屑，最後變成大家口中的藍絲。

海外華人的兩難，正正是對白人主流文化沒有歸屬感，但又接受不到中國那套政治制度。

所以，其實有沒有必要討厭整個族群呢？我個人經驗是，無論是香港人好，大陸人也好，都有我討厭和喜歡的人，他們當中有幫過我的，也有害過我的，其人品與原居地無太大關係，但由於我太習慣跟華人來往，太懂得華人那套相處之道，只有他們能讀懂我複雜的溝通方式，所以我不會說要避開他們。

而且，更重要的一點是，不要以為只要對方是白人，就一定好相處，無知傲慢自大的Red Neck多的是。

到底香港還是加拿大機會多?

自從搬來多倫多工作之後，我在偶爾的機會下加入了一個Facebook group（香港人在多倫多），裡面有很多不同年代移民來加拿大的香港人。

有七十年代就來尋找機會的老華僑，八九六四時還是中學生便跟著家人移民來的中年華人，亦有在九七前後移民，後來回到香港，最後又帶著子女「再回流」加拿大的香港中產家庭，也有從沒到過加拿大，但在佔中前後對香港前景感到憂慮才「走難」來的年輕人。

Group裡最常提到的話題之一就是在加拿大找工作。

很多香港人當年回流香港，很大部份原因是因為找不到適合的工作。注意，是合適的工作，不是找不到工作。如果在唐人餐館打工或者在超市收銀(Labour工) 都算是工作，那其實加拿大還是有很多選擇，問題是並非人人願意甘心放下身段。

很多人以前在香港可能高薪厚職，以前在香港有一堆下屬被他管，但來到加拿大只能被人管，職位低幾級，落差太大，又或者假假地算是一個白領／專業人士，因為語言障礙，各種文化差異，種族歧視，來了好幾年，還是沒辦法找到對口的文職，最後只好帶著年幼的孩子回去。

所以我小時候在香港認識過一些同學，他們雖然在加拿大出生，但從來都沒有在這邊讀書或生活，直至大學才回去，就是因為父母當年覺得香港機會較多，不想留加，如果想要外國身份，還是送下一代出國讀書比較容易，自己留在家鄉拼事業就夠。

言歸正傳，Facebook 裡面有很多人覺得反而香港機會少，加拿大機會多。我覺得很視乎以下因素：

(一)   你的行業

(二)   你的年紀

(三)  你的英文水平／文化融入程度

搞IT 的，來加拿大（包括美國），機會和薪水肯定比香港多，Workload也比香港少 。

做金融投資的，大多想回香港，加拿大的市場基本上比較靜，當地做BIG 4 的人可能連IPO 都沒聽過，有群友在溫哥華中小學畢業，多倫多大學讀金融，在加拿大找了很久都找不到 i-Bank工作，最後要南下美國華爾街才得到一個機會，然後內部申請調派回香港分部，從此除了探親以外不再回加拿大，事關對他來講，加拿大機會「少」。

做藍領工作，通渠、裝修、洗衣機／冷氣維修，可以考慮來加拿大，當地非常缺人，入行者大多收入甚豐，我認識一個師父六十多歲，幫人修理水喉，一個月接三個CASE，已經夠生活，每年還有閒錢去南美渡假。

加拿大職場有一個好處是沒有年齡歧視，或者是不能有年齡歧視，原因是他們非常著重私隱，而且為了保障就業公平，見工面試時僱主不能問你年紀，婚姻狀況，生育意願，宗教背景，拿什麼VISA（當然他們有辦法旁敲側擊地推測真實狀況）但普遍來說，你在CV 上面想寫什麼就寫什麼，即使不顯示畢業年份，僱主也不會特別在意，只會問你有關技能和經驗的問題。

即使年紀較大，四十以上，仍然可以和剛畢業的Fresh graduate 一樣得到Entry level position 的工作機會，公司沒有人會白眼你，我曾經有大媽同事一直做Receptionist，直至五十歲才轉到一個會計職位，最後還升了職。不同於香港，年紀大了再轉行，很多時公司未必願意接受。

至於英文水平，很簡單，英文越好，愈能融入主流，當然機會愈多，加拿大的公司等著你，可是如果英文非常一般，甚至沒法和當地人溝通，則只能留在華人圈子找工作，自然認為返香港較好。

我個人認為以上因素的影響次序如下：

行業＞英文水平／融入主流程度＞年紀

意思即是行業機會愈多，英文水平愈好、愈能融入主流的人，愈傾向留在加拿大發展。

不過當然還有其他影響因素，又要看是哪種行業，想到再討論。

ISFP - 毫無原則的弱者

有一種人好奇怪，表面柔弱和善好相處，實情無自己原則，有事第一時間縮埋一邊，人地兇兩兇就咩都講哂出來，只需要非常小的利益，就可以令佢地改變立場，出賣身邊人，又膽小又無GUTS，淨係識依附強者。佢地本身能力唔強，叫佢地出去打仗，同人談判無可能，但夠做埋哂Ｄ執頭執尾既工作，適當時仲識擦鞋，無錯，我就係講緊佢地，ISFP。

我以前認為表面強勢既人先會欺善怕惡，點知弱者都會，見到ISFP 我就明白。

如果你想聯合一班人對抗惡勢力，一齊搞革命，ISFP 係絕對唔會參與。佢地同軟皮蛇一樣，唔會付出努力去為自己爭取任何野，永遠只係等人施捨，有著數果陣又自然識行出黎拎埋一份，正宗Free Loader。

我遇過四個ISFP，有男有女，唔同國藉都有，三個都係岩岩識落果陣好相處，鐘意用Ｄ小恩小惠去同你建立關係，例如送Ｄ無咩實際價值既小禮物比你，得閒車出車入，安靜害羞，笑臉迎人，有人欺負佢地唔敢出聲，只會默默忍受，你諗住對佢地好Ｄ，幫佢地出頭，同人講數，佢地會同你建立關係，點知最後佢第一個出賣既人就係你，但你望返轉頭，其實果Ｄ所謂強者比到佢地既著數都係唔長遠，甚至無咩著數比到佢地，分分鐘仲要變本加厲係佢地身上Take 更加多既Advantage，但佢地係唔會理，亦無辦法thinking ahead。

S屬性限制左佢地只可以睇到即時既，Tangible 的利益，I同F屬性令佢地心軟唔敢反抗，收埋自己，P屬性令佢地傾向被人安排。

佢地好多時會同一份工做好耐，或者畢業第一份工係做乜就做乜，即使明知呢份工長遠黎講無咩前途，只要當下有錢賺，佢地都會繼續做，唔會考慮轉工，亦唔會有咩個人追求，甚至真係想轉工，都會拖到最後先做。

ISFP 一般對藝術，畫畫，設計有少少天份，女既鐘意化妝，著靚衫，注重時尚打扮，男既多數鐘意同女仔玩埋一齊，鐘意Ｄ小擺設，小飾物，但比人感覺蠢蠢地，但很少有什麼深刻的思想，對抽象的話題沒什麼興趣。

最近我遇到一對COUPLE，男既係ESTJ，女既係ISFP，天生一對，男既係BOSS，女既同一個Slave 完全無分別，一味被人安排自己既人生，乜都聽哂佢老公話，但連佢老公人品實際係點都唔知，完全無自己原則，無判斷力，是非不分，老公話乜就乜，就算要得罪埋自己阿媽同親戚都唔理，即係識得哦哦哦，睇怕佢老公叫佢去食屎佢都肯食。

當然如果呢個ESTJ係一個有能力既人，順風順水，佢自然可以照顧哂ISFP既生存需要，否則，ISFP 只可以跟住對方Fuck up together。

如果要對付ISFP，好簡單，一味對佢地惡同Controlling 就夠，千祈唔好心軟，佢地天性受硬不受軟，絕對犯賤，可憐之人必有可恨之處，絕對唔洗同情。

海外香港人其實都分好多種

定居左係外國之後，發現左好多野。

我一向無咩親戚生活係海外，就算有都係遠親，唔多聯絡，所以唔知道海外華人既生活狀況其實係點，對佢地既印象好多都係上網睇返黎而得知。曾幾何時，我以為係外國生活既香港人，諗野會同係香港住既香港人一樣，但原來唔係，可以係幾個完全唔同既群體。

當我既香港朋友話，你果邊咁多香港人，實好易識到朋友啦。我想講，唔係架，都要睇人。

一）好多香港人，特別係老一輩，幾乎都係生活在華人圈子裡，說話談吐非常香港，經常睇TVB，一班人逢周末飲茶，甚至返同一間教會好多年，人與人之間的關係可以好親密，可能仔女同孫輩都係香港生活緊，或者生活過，每幾年就返香港探佢地。當佢地得知你係香港來，會同你傾好多野，又問你好多問題。佢地對中國人既身份認同非常強烈，對西方價值觀則有所微言，經常用「我地唐人係點點點，佢地鬼佬係點點點」去評價當地事物，與當地人劃清界線，亦希望後輩可以多了解中華文化，有機會就返中國或亞洲發展。

二）與此同時，有一部份香港人既思維已經非常西化，習慣左講英文，睇本地新聞，和西人相處多過與華人相處，你同佢地講廣東話，佢地反而會應得慢，講唔夠兩句就會用英文答返你。另外，由於西方社會非常著重個人私隱，同華人文化好唔同，所以佢地亦唔會講自己太多野，又好少問你太多私人野，話題都係好表面。你同佢地講香港既話題或人物，佢地可能比唔到反應你，亦唔知你講緊邊個，基本上已經變左半唐番，對中國，對香港既印象係模糊既。更有一部份香港人以西化為榮，完全拋棄中國文化，完全唔想下一代識中文，傾向同新黎既華人移民保持距離。

三）當然，亦有一部份香港人對香港人身份認同非常強烈，雖然擁抱華人價值觀，但對西方文化亦不拒抗，熟悉兩地新聞，兩邊都融入到，適應力非常強，見人講人話，見鬼講鬼話，西人華人朋友各佔一半。

可能我以前係香港既生活圈子相對狹窄，大都係同差唔多階層，年紀，成長背景、工作環境既人來往，習慣左一套既有既溝通模式。但身處外國，即使眼前有人自稱香港人，其人生軌跡同背景都可以相差極遠，大家諗野可以千差萬別。

從此在楓葉國，當我見到任何一個香港人，都唔可以假定佢地一定會明白我講既野，連玩笑都唔敢亂開，有一些以為係香港無傷大雅既笑點，對人地黎講可以係非常offensive，同一句說話，對方既反應可以係差天共地，所以，我必須小心翼翼地推斷對方係屬於邊個群體、到底有咩想法先可以進行交流。

最令我尷尬既係，當我習慣左當地文化，諗野亦漸漸西化時，面對岩岩黎既香港移民，佢地反而覺得我講野好奇怪，好唔自然，因為我慢慢亦忘記左以前同香港人果套相處方式係點。

係香港人眼中，我好似已經變左半個當地人（鬼佬），但係當地人眼中，我既價值觀仍然係好華人，彷彿身處左係無間道入面咁，唔上唔落。