居家隔離的第44日

最近都是留在家沒有做什麼，隨便記事一下。

• 收到香港好友用DHL寄來的一百個日本口罩，十分感恩，真的人間有情。

• 已經連續咳了兩星期，但是又沒有發燒，今早打電話去診所，只能遠程問診，醫生直接把藥方Fax到附近的Pharmacy，讓我拿了抗生素之後回家服用，暫時還有咳嗽，但是沒有之前厲害，初步估計是氣管細菌感染，如果之後還是再咳，便會叫我去診所照X-Ray。很奇怪，來了多倫多之後每年二月到四月我都會連續咳一兩個月，不知道是不是花粉症還是天氣問題。不管了，反正不是武漢肺炎就好。

• 本來想趁空餘時間做麵包，但是超市的麵粉已經賣光，連酵母菌都缺貨，我還是回家洗洗睡，諗諗下不如都係自製燒賣。

居家隔離的第32日

今早打電話給政府問失業保險的事，他們說本來我的Case 屬於Borderline，不太符合條件，因為是我主動Quit第一份工，但因為肺炎疫情影響了我第二份工，所以現在接受我的申請，容許我拿完緊急救濟金之後再繼續拿Regular Benefit，所以如果七月再不復工，我可以繼續領保險金直至明年三月，這樣子幾乎一整年不用上班，這裡的福利真的不是香港能夠相比，加拿大，大家拿。

但當然這並不是我的首選。如果可以，我寧願上班賺錢賺工作經驗，因為太久沒上班不是好事，日日留在家雖然很自由做很多自己想做的事，但總有想出去的時候，況且又不能去旅行，一旦出境你的保險金就會被取消，直至你回來加拿大為止，就算你已經花光了，也要你嘔返出來，加拿大政府部門人員平時做事馬馬虎虎，九唔搭八，問非所答，但講到追錢方面可謂效率第一。正常情況下，如果沒有肺炎病毒，我也不希望只拿福利不工作。

相信不用多久加拿大就會學其他歐美國家一樣如期復工，畢竟對政府政客和大財團來說，經濟（利益）才是排第一，人命總是次要的，反正要死的又不是他們。況且羊毛出自羊身上，今年大家拿完錢留在家UN UN腳，明年肯定又要加你重稅，填補空虛的國庫，不復工又怎樣叫大家交稅呢？

趁現在想想哪隻股票值得入貨比較實際。

美國內戰中國何以應對

美國內戰中國何以應對
https://www.youtube.com/watch?v=FVG_55aayy8

雖然視頻的字體設計非常老土和核突，但內容提及到一些黃色媒體從來都沒有提過的事實。

簡要：

• 美國立國史
• 美國如何透過掠奪全世界資源鞏固集團利益
• 美國在疫情出現時如何調控經濟

利申：我不是藍絲，但我覺得香港不應該一面倒盲目崇美，卻又不了解真正的國際政治，世界從來沒有哪一方是絕對正義，只有利益主導。

加拿大緊急救濟福利(CERB)

加拿大政府宣佈從四月六號起，只要你能證明自己因為肺炎措施而失業，便可申請加拿大緊急救濟金福利，Canada Emergency Response Benefit (CERB)，每四星期會發出二千蚊加幣，即是差不多HKD 12000，總共可以領4次，合共4萬多元港紙。先申請再說，查到你是虛報再叫你嘔返出來，都好，幫手紓解民困。

如果你生活在多倫多市中心，又要交租食飯，基本上是不夠花（公寓租金平均CAD 1800 至2500，視乎大小和地段），不過幸好現在很多業主稱租金可以Delay交，所以用這筆錢買食物是有餘的。

我想這段日子大概是人生最夢幻的時刻，不用上班，不用讀書，白白領錢做自己喜歡做的事，等經濟恢復再開工，提早過上半退休生活，百年一遇，夢醒了就要開工。

但又這樣說，其實加拿大很多人都在Struggle，事關本地人儲蓄率奇低，一個Household Family一年才儲CAD 5000 (around HKD 30000)，現在經濟停擺，他們基本上要靠政府施捨度日。

我們也只是因為平日比較省錢，現在才不致那麼緊張，純粹好彩。

不然我就要像其他人一樣，要去食物銀行和教堂。

以下是我一位失業朋友領到的便當：

一星期只有三日派食物接濟窮人，這個份量足夠星期五六日食用，不過據說味道一般。

居家減肥計劃

加拿大安省政府日前宣佈進入緊急狀態，叫全部市民如無必要切勿外出。

就是因為如此，原本這個時候我已經開始返我份新工，但現在只能留在家裡。

當初離開香港有一半原因是為了逃避強國政權，以為人到了加拿大便安然無恙，誰料現在他們竟然向全世界輸出病毒，遠到冰島都有人賴野，搞到全球經濟大衰退，連我份工都無埋，真係多得佢唔少。

為了減少外出，現在一天只吃兩餐，當減肥也好，自從辭職之後，沒什麼運動，在家吃完泡麵吃甜品，還有一大堆零食，我的體重升到差不多120磅，現在是時候還債。

一起床在家做一小時的帶氧運動+重力訓練。

韓國鄭多燕的小紅帽系列主要是練下半身，跳半小時Aerobics 已出一身汗，有種錯覺以為自己真的運動了很久。

真正有效的Workout 應該是HIIT，即是 High-intensity interval training，中文是高強度間歇訓練， 用全身的力量，在短時間（三十分鐘左右）做出需要爆發力的動作，並在中間穿插長時間的低強度活動來讓心跳恢復，這種運動方式不但可以幫你在短時間內增加肌肉，同時亦燃燒脂肪。

下面這個是HIIT Workout Video，主要練上半身：

我喜歡這個Channel (Group HIIT)，做完之後真的要狂飲水，做了五日，現在體重下降了三磅，而我目標是減十磅，看來要再堅持多一陣子。

講真，我不是追求極瘦身材，但也不想看見自己再肥下去，人老了，身體基礎代謝率會下降，以前讀中學時食足五餐都不會肥，現在多吃一口雪糕都不敢，現在不能不減。

憶苦思甜

肺炎殺到黎多倫多社區，而家開始要減少出街食。

男友是半唐蕃，煮西餐叻過我，呢餐由佢負責。

是日晚餐：橄欖油黑醋蕃茄生菜沙律，蘑菇肉醬意大利粉

每個人十五蚊港紙，已經飽到食唔落，要留第二餐。

加拿大雖然好多野真係好On9，但無可否認生活成本真係平過香港好多，只要你唔出去食，留係屋企煮，仲要餐餐豐富，飽到你食唔落，平均每個人既花費只需要一千二百蚊港紙。

呢個時候，你可能會話，車，你係香港落街市買自己煮都係呢個價啦。

但係呢邊既後生仔只要讀完大學，唔係乞食科畢業，專心做兩三年野，唔係周圍旅行Gap year，一般都會有三萬蚊港紙，到左三十歲時，一般都有四至五萬一個月，如果係專業人士，例如搞IT，搞金融，賺得仲多。

買屋無香港咁貴，食野又咁平，只要唔大洗，其實儲到好多錢，想係五十歲前提早退休其實唔難。

當然好多鬼佬慣左今朝有酒今朝醉，完全唔識理財，白白浪費左呢個難得機會。

難為亞洲Ｄ後生仔由細到捱生捱死，讀書考試幾辛苦先有個大學學位，出到黎仲要同Ｎ個人競爭一個 Low-end position，比人壓價之餘過住有返工無放工既奴隸生活，就算幾精打細算都無辦法買樓結婚生仔，做香港人真係好慘。

即係講緊以前既我。

所以我真係諗都無諗過自己會有一日過住而家咁既生活。

以前係香港一個人住時，食野真係好求其，係個劏房煮個麵，碌個烏冬就算，有時會係百佳買PACK 好哂既餸炒兩炒，煲一煲飯又一餐，由於細到無位放雪櫃，所以唔可以留過夜，唔可以帶飯返工。

好多時放工就係公司飯堂食，廿蚊叉燒飯，廿五蚊兩餸一湯，有得食已經好感恩，食完好快趣返屋企沖涼訓覺。

一係返到屋企樓下食越南粉，有特價，三十五蚊一碗，或者去爭鮮排隊買八舊壽司又一餐。

再唔係食老麥，果陣買左份三號脆香雞翼餐，或者八號芝士漢堡餐已經好開心。

總之平均每月唔可以洗多過三千蚊係食飯度，如果唔係就儲唔到錢買樓，買唔到樓就要一世住劏房，諗起都驚。

男友知道我以前過著Ｄ咁既生活真係聽到O左咀，後來跟我返香港探親時，我特登帶左佢去我以前食開既鋪頭（全部都係舊區）回憶當年，佢忍唔住講左句，好彩你賭一鋪黎左加拿大生活。

關閉設施後的第一個周日

加拿大政府呢兩日終於宣佈關閉大部份公共設施，可能因為總理杜魯多既老婆中左招，佢先開始識驚。

我地住既公寓都關閉哂泳池和健身室，而家要做運動只可以留係屋企。

本來想出去食壽司，但係怕增加感染機會，唯有留係屋企煮野食。

最近係網上學識左煮香港譚仔米線。

真係好容易，肥牛片，生菜，加豆瓣醬，加兩匙白醋，加少少花椒，即變酸辣肥牛米線。

一路食一路上網睇返以前係香港做野無時間睇既TVB 劇集，好耐無試過咁HEA。

突然醒起有事要去圖書館，點知發覺門都唔開，起碼要等到四月中。

可能驚有社區爆發既危險。

行去附近超市，見到有紅莓黑莓做緊特價，12蚊港幣一盒，順便買左兩盒。

武漢肺炎終於來到加拿大

加拿大做咩事都慢人一拍，一個月前仲係度笑亞洲人去超市排長龍搶口罩，搶消毒洗手液，搶廁紙食品日用品，而家終於輪到佢地自己做埋同一樣野。

不過本地人本來就有囤貨既習慣，因為唔係成日有得去超市，通常一出去就買哂一星期就食既野，而家大條道理繼續囤多Ｄ。

回想起以前係香港住，行落街就係超市，每次買雞蛋買四隻已經覺得好多，而家真係兩種生活。

但呢班人仍然堅持唔帶口罩。

我都唔知話佢地天真定勇敢好。

後日我就返新工啦，又要搭電車同地鐵，其實我好想帶口罩，但又好驚比痴線佬打。

講真，雖然種族歧視係唔需要理由，想搵機會打柒你就打柒你，不過我覺得帶左又好似異類。

以為西人超市先係最多人去搶野食，點知唐人超市一樣。問題係佢地買果Ｄ係新鮮蔬菜肉類，擺得幾耐？

因為大家都開始搶物資，可能有人拎住枝槍周圍搶劫，加拿大人又開始去買槍買子彈保護自己。

生活係北美真係好似自生自滅咁，有事唔好旨意警察保謢到你，事關報得警黎，你已經無左條命，好多野都要自求多福，另外警察好多時都會話拉唔倒，就算拉左都未必重判。

西方人講究自由，你有自由，人地都有自由，人人都可以做自己想做既野，於是變左無王管既狀態，想要有秩序既生活，都係留返係亞洲好。