文化觀察

香港與加拿大的文化差異極大，如果要在這邊生存，不想冒犯別人，必須要注意以下事項：

一）切勿亂開玩笑

香港以華人文化為主導，華人文化又屬於高情境文化，有很多笑話只有我們自己才明白，大家喜歡開玩笑去增進感情，見怪不怪，無傷大雅，但在多元文化的加拿大，這種做法將會為你帶來麻煩，一來其他種族的人不一定了解你的笑話，二來很多人自尊心比較重，對陌生人的信任度不高，你在香港和親朋好友/同輩之間的溝通方式，不一定適用在這邊，當你以為大家的關係已經足夠好，可以隨便開玩笑，殊不知對方根本不接受這一套，分分鐘生氣到絕交不聯絡也是常有的事。

所謂多元文化，實際上代表了你不能隨便亂說話。儘管北美有公領域的言論自由，你罵政府不會被追究，但在私領域裡你必須小心言行，人與人之間的相處比起在單一文化的中國語境裡更為複雜，要有相當的文化敏感意識。

最保險的做法是只說事實，不說觀點，不說感受。

二）小心被指控種族歧視

另外廣東話裡面也有很多帶有歧視性的字眼，例如鬼佬，阿差，竹昇仔，印度佬，黑鬼，兩個本土香港人交流時可能都未必認為這些稱呼有任何惡意，整個討論可以很中性，但是當你和加拿大的華人聊天時，即使對方說廣東話，也不一定接受你用這些字眼去稱呼其他種族的人，尤其是自小在這邊長大的華人二代，或者思想上已經西化了的香港老移民，他們很可能對你的用字感到不適。或者我應該這樣說，每個人都是獨立的，不想得罪人，最政治正確的做法還是保持用字中立。

三）千萬不要做伸手黨

你可能會說，這很正常啊，我們香港人一向處事很獨立，很多事都是自己搞惦。

但以我觀察，香港人在工作上獨立，但在生活方面和其他人的關係非常密切，朋友親戚之間常常在小事上互相幫忙，很多認識不久的人願意對你贈言幾句，或者對你提出幫助也是很常見的事，久而久之，大家不害怕向陌生人求助，而對方又真的毫不介意給你一定程度的指引和資源，所以其實香港社會並非如我們想像中冷漠。

但加拿大，特別是多倫多，很多人都是非常斤斤計較，如果你從對方想得到一些資訊（利益），最好自己也有一些資訊在手，以便交換。

假如對方幫了你一個忙，你千萬要說一些話感謝他人，甚至作出其他方式的回報，不要以為人家和你熟，便大安旨意。

否則一次兩次之後，對方便很可能不會再理你。

在這裡表示自己的Sense of gratefulness 是非常重要的。

另外，即使有些事情在你眼中只是一個小小的幫忙也好（用你自己的文化觀點為標準），在別人的角度可能也是天大的事，你不能理所當然地認為別人一定有義務要答你問題，或者提供協助，所以你最好有心理準備別人不一定會答應你的請求。

另外，去問別人問題之前，最好自己先做好功課，不要問一些明明上網也能找到答案的事情，浪費他人時間，加拿大人對伸手黨的反應比起香港人激烈十倍，即使大家已經相識一定時間，對方也不一定願意幫一個在你眼中的小忙，大家要有心理準備。

表現出獨立的處事方式，不依賴他人，是一種禮貌，與華人文化中的入屋叫人一樣重要。

四）不要以為自己比中國人優越

在不少本地人眼中，香港人和中國人都是華人，甚至只是亞洲人，黃種人，中日韓台越南大馬新加坡都是同一個圈子的人。

如果有老外分得清楚，也只是他見識多。

很多香港人以為中國學生不留下來是因為英文不夠好，其實不一定，他們有很多人英文說得非常流利，而中國卻能給他們更好的事業發展平台，人脈資源都不用從新累積，加上沒有很留戀西方文化，所以連PR卡也不要。

以大香港主義的心態把優越感建立在其他華人身上，只會顯得自己思想狹窄。

多倫多的Mean人(二)

在外國大城市生活的人對彼此的信任度都不高，直情可以說低於香港很多。

有時發生一件事，對方第一步不是先跟你溝通，去澄清中間可能有什麼誤會，而是不加思索地用最壞的角度去解讀你的行為，然後用最誇張的方法去攻擊對方。

事件一）

試過有一排我發高燒，咳到係辦公室人人都聽到，每一分鐘我都咳一次，我於是同老板請假，但因為氣管發炎，咳左兩星期都未好，所以要再同老板請多一日假，佢開始覺得我係想呃病假，但明明佢都聽到我咳得辛苦（後尾我真係咳左兩個月先好返），唔知點解佢下意識就覺得我講大話，對我態度開始差。

我的部門工作量不算多，在香港我一個人做三個人既野，係呢邊，我覺得係一個人既野分左比三個人做，所以我從來都無話做唔哂野，甚至一星期有大部份時間我都係上網睇高登連登，因為好多野佢預我要用一個月搞惦，我用一星期就做起，其他野我唔敢講，但香港人工作效率真係世界聞名，所以其實我請多一兩日病假，都唔會影響到任何事，況且我真係病。

後來我先知，呢度好多人詐病唔返工，詐到離哂譜，加上加拿大高度重視私隱，所以唔可以要求對方比醫生紙，連病因都唔可以問，所以要講大話真係比香港容易，香港起碼都要去診所比幾百蚊拎醫生紙啊，呢邊係屋企發個電郵就算。

之但係，如果你都見住個員工係辦公室咳到氣喘，你懷疑對方又有咩用？我返到黎係咁咳都唔會有咩生產力。

好明顯我前老板已經比大量不誠實的員工嚇怕左，然後產生非理性行為，乜都質疑左先。

事件二）

試過我要同IT部門溝通，平時搵開果位員工咁岩放左假，我唯有走去問另一位高級少少既同事，因為果排公司網路系統有問題，所以我無辦法同係美國既同事溝通，又一定要搵IT 部門既人先可以Remote檢查到果邊既辦公室電腦系統係咩情況，於是我本著好好禮貌既態度去問果個IT 人應該點做，問到第二次，佢突然發脾氣，講一大堆野寸我，後來先知唔係我問題，仲要比CEO新請返黎既Director係電話聽到，對方嬲到震，即刻Send左個電郵比我老板，叫佢搞惦呢壇野。

後來我諗諗下，應該係呢位同事下意識係以為我玩9佢，所以一黎就用一種勁惡劣既態度去同我溝通，所以無耐我就完全無視呢個人，行出行入都唔同佢打招呼，因為佢既行為唔值得我的尊敬，佢反而又無啦啦一副好驚既樣。

我唔明白，你發得我脾氣，預左架啦。難道你咁樣寸完人，仲奢望我會同你講野？可唔可以唔好咁好笑？

有事唔係正正經經拎出來講清楚，而係咁樣發脾氣，唔知係咪我好彩，我係香港好少經歷呢樣野。係香港呢，所有Rules 都已經定好哂，大家跟住做就係，就算有幾唔鐘意，都好少咁樣發人脾氣，你要指責人，就必須要有理有據，但唔知點解呢度Ｄ人唔洗，只要夠粗魯刻薄就得。

就算我以前在魁省上班，都沒試過有這樣的情況發生。

我一直諗唔明點解呢度既人咁奇怪，以為這只是我的公司問題，直至我遇到愈來愈多人，再同其他中國香港黎既移民傾開，問他們在其他機構上班的情形，先發現係呢邊文化既一種。

事件三）

一位華人竹昇同事明明間中都同我食Lunch，仲介紹朋友給我認識，我一直對佢都好客氣好有禮貌，亦從來無要求過佢為我做任何野，但有一日涉及到安排工作時，因為我隻手傷左，我用內部通訊用text message佢（他與我並不坐在一個房間，所以他當日並沒看見我），話要遲一日先幫佢整理公司既舊檔案，比埋時間日期，問佢接不接受，事實上那些檔案是長年沒有人用，他也不會用，只需要有人幫他放好，而我任職於管理信息的部門，所以他會跟我溝通。

佢竟然可以即刻話：你隻手傷左仲可以同我打字？
我：點解唔打得？
佢：你咁講，我隻手都傷左。
我開始嬲，打左一句：咁你用腳打字囉。
佢：你示範我睇。

後來我好嬲，去到佢辦公室，問佢，係咪而家要檔案？！係的話，我地而家拎。

佢見到我隻手真係扎著繃帶，先知道誤會左我。

其實我唔介意你同我講呢件事對你來講有咩重要性，點解你一定要今日做，如果真係好急，我會安排另一位同事幫手。

但係，你走去質疑我話自己隻手受傷係一個謊言，果一刻我覺得好嘔心。

當你以為同一個人熟到某個地步，先發現因為一件關係到佢利益既小事，對方就即刻懷疑你，你先知原來相處左咁耐，大家係無信任基礎，而所謂利益，亦只係對方願不願意在你安排的時間來幫你處理文件，而唔係任何急事，或者重大的工作項目。而幫你做左呢樣野，係咪會幫你升到職加到人工？唔會，只係幫佢慳左少少時間。

我無法想像，有一個地方既人可以短視計較到咁。為左慳兩個鐘頭，犧牲一段關係。

機關算盡，只係想利用你為他做一些自己不想做的雜務，所以你只要有自身的考慮，不是做100%符合他利益的事，都會引起對方的懷疑，因為他們自己本身就是一個靠欺騙他人來達到目的既人，難怪也沒法信任誰。

信任是雙方的，你懂算計，別人也會，即使對方明明沒有想欺騙你的意思，但因為你的種種懷疑，也令他變得開始對你有所警惕，你會認為他真的是有欺騙你的可能性，於是大家開展了一段虛假的關係，即是心理學所說的自我預言 (Self fulfilling Prophecy)

然後到談利益時，他們就說大家是朋友，你要幫忙。
到你認為大家是朋友時，他會開始跟你談利益。

我不是說大家不能談利益，成年人的世界，互相利用是常事，但是我感覺他為人太過短視，很容易為一點利益出賣他人，和這種人相處，你注定只有吃虧，分分鐘你為他付出完之後，仍然一無所得，而對方則利用你想要的東西和弱點去繼續操控你。

可惜他不明白，我看一個人是看對方的Integrity，還有他本身的格局。

他的小把戲，套用大陸人的用語，就像是一個跳樑小丑，在台下的我都看得一清二楚，所以在辭職後，即使他仍然跟我假裝友好，我都不再和他聯絡。

注意：呢個人係ESTP，我係INFP，大家都係P型人，唔會迫到人太盡，所以就算唔妥大家，都唔會撕破面子，但好明顯我和他的價值觀完全相反。

多倫多的Mean人(一)

住左係多倫多咁耐，發覺有一樣野就係，有好多人好Mean，係由內到外，不分種族果種Mean (唔好諗住華人就會好好多，受到同化的華人多的是），唔知係咪由細到大都生存係一個極度不友善的環境，佢地好精於搵位寸人，鬧人，尖酸刻薄，想盡辦法令你唔舒服，睇唔起人。

好耐以前有個Red Neck白人後生仔問我之前午飯食乜，我答Chicken Burger，佢會答，You know，I will never eat chicken burger, because it sounds like high school food for me.

其實我唔明點解佢會諗得到Chicken Burger 會同High School 有關係，基本上好多人都食呢種食物，邏輯上係扯唔埋，但係佢可能只想串我個樣後生，同High School student 無分別，但其實我比眼前呢個人年長十年。當然，Red Neck係唔用腦思考既，從來都只係一群睇表面的生物，所以佢地見到乜就會講乜，唔會諗自己講既野岩定錯。我在魁省讀碩士時，半隻這樣的生物都沒遇過，人人政治正確，有禮貌到嚇親，黎左安省做野之後，先見識到原來加拿大的人口質素如何參差。

我係香港又真係無遇過呢種人，寸既人唔係無，但唔會係呢Ｄ無關痛癢的地方上面寸，比人感覺質素太低。我時刻都覺得自己好似同緊一班小學生共事，要將自己拉低到佢地個水平思考，為左Ｄ白痴無謂野同對方爭論，浪費我既時間。但當地人好多就係咁既質素，Red Neck 的數目多不勝數，基本上十個有六個都係呢種人，所以我唔明點解香港人咁崇洋。

呢個白人後生仔好搞笑，佢好鐘意周圍睇唔起人，但自己又無咩本事，讀完高中，College Engineering 畢業，這是一個非常有需求的行業，而他的朋友都有Offer，但只有佢一直都搵唔到相關既工做 (係佢自己親口講)，好彩佢老母離婚後嫁左個律師，而佢Stepfather係我前公司既法律部門做到好大粒(算係CEO的老友記)，所以佢一開聲，搭上搭，請左佢入黎做打雜，幫IT部門拉下線，裝下電腦，聽下電話，由最低工資開始做起，佢做左兩年，Keep住搵工，中間都有面試，包括佢表哥都介紹，照計成功率會高好多，咩銀行，咩大公司，但係次次都見唔成功，直至我辭職後，都依然留返係度做，如果唔係靠後父，都唔知佢而家係咪仲匿係屋企量緊地。

從我地第一次見佢開始，佢已經係Socially Awkward，唔識同人溝通，唔會同人打招呼，跟住其他部門經理教佢野，次次對方未講完，佢為左表現到自己好醒目，就會不斷問問題，打斷人地，最後搞到個經理唔想理佢，寧願自己做返。

同時佢一開口就得罪人，試過當住我地成班Chinese 同事面前講起煮食用具，然後話佢唔會買中國製造既鑊，因為All Chinese stuff are cheap，我和同事你眼望我眼，唔知佢有心定無意，但好明顯佢真係好唔Culturally Sensitive，如果有人扯到去種族歧視，佢就大鑊。

又試過我直行直過無視佢，當佢無到，佢會嚇到鳩縮，之後又好聲好氣同我打招呼，我都唔明佢想點。由你開口寸人果刻開始，我都唔會預你想同我建立關係，咁我唔理你又有咩問題呢？但唔知點解佢又會心裡淆底，驚到震咁問我How are you?  連佢上司都係咁，兩個都係Red Neck，我實在摸不著頭腦。到你同佢打返招呼，佢又開始佢既冷漠Mode，如是者來來回回，我無咩耐性，乾脆全部經過都扮見唔到。

其實你唔在乎人，人地就自然唔會在乎你，好正常。你連對人既基本尊重都無，人地點解要采你？

講起種族歧視，有人話，你好難介定咩為之歧視，有時你都唔太肯定，又驚殺錯良民。

其實，呢樣野無咩明顯既分界線。

只要果個人講野令你唔舒服，你就可以投訴，行埋去DIU佢。

你大可以話，what do you mean by XXXX? Are you being racist?

或者同HR講，Last time Person A said XXXX to me, I do not know what he means, but it made me really feel uncomfortable and associate it with my cultural background and my race.

重點不在於對方說什麼，而是他說的話令你如何聯想到你的文化背景，而又包含了負面意思。

就算最後比人話你過份敏感，都唔緊要，有殺錯無放過，正係北美的生存之道啊。

比起會殺人的人，他們寧願得罪唔出聲既人。

因為呢邊始終係強盜文化，華人果套果套謙謙君子都係留返係儒家文化圈使用，外族係唔會識欣賞。

兩年來的經驗，令我對人的期望降低左好多，只要有人一埋來我身，我第一件事唔係諗佢會有禮貌地同我建立關係，而係諗佢又想點玩野，我都驚我再住多幾年會變成呢種人。

如果對方竟然好親切有禮貌，我會讚嘆呢個人真係稀有生物，遇到既機率同中六合彩無咩分別。

加拿大緊急救濟福利(CERB)

加拿大政府宣佈從四月六號起，只要你能證明自己因為肺炎措施而失業，便可申請加拿大緊急救濟金福利，Canada Emergency Response Benefit (CERB)，每四星期會發出二千蚊加幣，即是差不多HKD 12000，總共可以領4次，合共4萬多元港紙。先申請再說，查到你是虛報再叫你嘔返出來，都好，幫手紓解民困。

如果你生活在多倫多市中心，又要交租食飯，基本上是不夠花（公寓租金平均CAD 1800 至2500，視乎大小和地段），不過幸好現在很多業主稱租金可以Delay交，所以用這筆錢買食物是有餘的。

我想這段日子大概是人生最夢幻的時刻，不用上班，不用讀書，白白領錢做自己喜歡做的事，等經濟恢復再開工，提早過上半退休生活，百年一遇，夢醒了就要開工。

但又這樣說，其實加拿大很多人都在Struggle，事關本地人儲蓄率奇低，一個Household Family一年才儲CAD 5000 (around HKD 30000)，現在經濟停擺，他們基本上要靠政府施捨度日。

我們也只是因為平日比較省錢，現在才不致那麼緊張，純粹好彩。

不然我就要像其他人一樣，要去食物銀行和教堂。

以下是我一位失業朋友領到的便當：

一星期只有三日派食物接濟窮人，這個份量足夠星期五六日食用，不過據說味道一般。

青瓜味薯片

呢隻薯片真係好好味，口感非常特別，就算而家因為肺炎搞到就快世界末日咁，我都覺得此生無憾。

但好奇怪，青瓜味薯片係北美係無得賣，我只可以在華人超市搵到，以前係香港已經食上癮，黎到加拿大仍然好掛住，價錢比本地薯片貴少少，4蚊加幣左右，即係24蚊港紙。

除左青瓜味，佢仲有意大利肉醬意粉味，四川燒烤味，同埋榴槤味，男友見到覺得好surprised，佢話估唔到薯片可以有咁多古靈精怪既味道。

我話，你地本地人食野其實好保守，接受唔到新口味，食黎食去都係BBQ , Salt & Vinegar, Tomato。

佢都表示認同，畢竟亞洲人口多，市場大，商品選擇比較多元化，成日有好多未見過既新產品推出，呢樣野由四年前已經講左好耐，去到近呢一年我先開始唔再比較兩邊既食品選擇。可能覺得再Complain 都無用，默默接受左呢邊就係悶。

其實如果唔係要諗計係呢邊搵錢謀生，純粹過生活，我都接受到，係冬天長左少少，凍左少少，出街食飯無咁方便，同埋成日見唔到朋友，其他都還好，畢竟我係宅女，都唔鐘意成日出去。

不過如果第時真係要退休，首選都唔會係多倫多。

識揀一定係揀東南亞，台灣都可以架，生活成本低，野又好食，當地居民又Nice，夫復何求。

關閉設施後的第一個周日

加拿大政府呢兩日終於宣佈關閉大部份公共設施，可能因為總理杜魯多既老婆中左招，佢先開始識驚。

我地住既公寓都關閉哂泳池和健身室，而家要做運動只可以留係屋企。

本來想出去食壽司，但係怕增加感染機會，唯有留係屋企煮野食。

最近係網上學識左煮香港譚仔米線。

真係好容易，肥牛片，生菜，加豆瓣醬，加兩匙白醋，加少少花椒，即變酸辣肥牛米線。

一路食一路上網睇返以前係香港做野無時間睇既TVB 劇集，好耐無試過咁HEA。

突然醒起有事要去圖書館，點知發覺門都唔開，起碼要等到四月中。

可能驚有社區爆發既危險。

行去附近超市，見到有紅莓黑莓做緊特價，12蚊港幣一盒，順便買左兩盒。

武漢肺炎終於來到加拿大

加拿大做咩事都慢人一拍，一個月前仲係度笑亞洲人去超市排長龍搶口罩，搶消毒洗手液，搶廁紙食品日用品，而家終於輪到佢地自己做埋同一樣野。

不過本地人本來就有囤貨既習慣，因為唔係成日有得去超市，通常一出去就買哂一星期就食既野，而家大條道理繼續囤多Ｄ。

回想起以前係香港住，行落街就係超市，每次買雞蛋買四隻已經覺得好多，而家真係兩種生活。

但呢班人仍然堅持唔帶口罩。

我都唔知話佢地天真定勇敢好。

後日我就返新工啦，又要搭電車同地鐵，其實我好想帶口罩，但又好驚比痴線佬打。

講真，雖然種族歧視係唔需要理由，想搵機會打柒你就打柒你，不過我覺得帶左又好似異類。

以為西人超市先係最多人去搶野食，點知唐人超市一樣。問題係佢地買果Ｄ係新鮮蔬菜肉類，擺得幾耐？

因為大家都開始搶物資，可能有人拎住枝槍周圍搶劫，加拿大人又開始去買槍買子彈保護自己。

生活係北美真係好似自生自滅咁，有事唔好旨意警察保謢到你，事關報得警黎，你已經無左條命，好多野都要自求多福，另外警察好多時都會話拉唔倒，就算拉左都未必重判。

西方人講究自由，你有自由，人地都有自由，人人都可以做自己想做既野，於是變左無王管既狀態，想要有秩序既生活，都係留返係亞洲好。

新移民的「受害者情意結」

上篇講起依賴心態，令我想起其中一樣係加拿大觀察到既野。

好多新移民有「受害者情意結」，覺得自己係新來，岩岩來到乜都唔識，好不容易先離鄉別井，無人幫好慘，所以我弱我有理，你地唔幫佢就係衰人。

問題係，無人迫你移民來。你話你走難就唔同，做難民真係無得揀，個國家打緊仗根本返唔到去，呢Ｄ人就真係被迫留係度，堅係慘。

透過正常途徑移民，通常都係得幾種：婚姻移民，技術移民，投資移民，三種都係自願。移之前係咪應該自己做足心理和財政上的準備？

有些香港人，平時去旅行飲飲食食，乜野機票酒店都BOOK好哂，咩行程都安排到，識得放上FACEBOOK/ IG 曬命。但一講到移民，唔知點解個思維好似返左去八九十年代咁，明明而家互聯網發達，一早租定AIRBNB並唔難，當地亦有很多租屋網，歡迎長短租，選擇也很多。但佢地完全無計劃利用這些資訊，完全沒有研究過要買／租什麼房子，在哪裡住下來，淨係諗住投靠當地親友，有乜事都係去到當地先慢慢搞，又不會查下當地生活成本要幾多，唔諗住做Research，大條道理住係對方屋企，要人車出車入，無諗過幫手做家務，好似完全失去哂自理能力咁。

你既朋友當初又何嘗唔係新移民？唔通佢地又有朋友係度借屋佢住？係咪你朋友唔係度就唔移民黎？美加都是移民社會，有幾個黎到落地生根之前已經識人係呢邊生活？

係，你係好慘，但人地都有自己的難處，係咪人地滿足唔到你的要求就要發難渣呢？

但係呢Ｄ人係唔會咁諗。

佢地平時在香港受太多照顧，養尊處優，一開口求助，屋企人朋友親戚紛紛幫手，黎到加拿大，改變不到自己的香港Mode，繼續張手就來，覺得別人的付出都是理所當然，三十幾歲人都仲係典型港孩思維。永遠覺得自己既利益先係最重要，你既利益係可以被犧牲。

你唔單止唔可以唔幫佢地，仲一定要用佢要求既形式幫，唔可以有自己意見和想法，唔可以保障自己利益，否則你就是背叛佢。點解佢可以咁諗？因為佢覺得全世界都係佢既Slave，你地都係低佢一等，佢肯願意同你做朋友，搵你幫手，係你既榮幸，你竟然唔珍惜？咁就唔好怪佢同你斷絕關係。

呢Ｄ人最有趣既地方係，原來移民黎既時候，公司已經比左租屋津貼佢地，但係佢地一蚊都唔想比，所以先住朋友度。

講到自己係受害者咁，根本孤寒人地，闊佬自己，以小換大，著數攞盡。

加拿大職場相對簡單?

很多人說在加拿大工作，人人互相尊重，職場人際關係相對比香港簡單。我聽了第一時間心諗，下？你生活在加拿大哪一個地區呀？這些人是不是因為自身太幸運，所以以為自己的經歷就代表了整個加拿大？

由於我不是移民中介，所以我從來不會以糖衣包裝 任何有關加拿大的事物，閣下愛看便看，如果想看正能量移民Blog / Facebook page，請稍移玉步。

加拿大其實分很多不同部分，光是小城市和大城市的文化氛圍已經不一樣，小城市人人有禮善良，大城市戾氣重重，人口組成部份複雜，勾心鬥角嚴重，人與人之間信任度低。

你的城市＞你的行業＞你的公司＞你的部門＞你的老板的管理風格，才是決定你的職場生態環境的因素。

多倫多，移民多，大城市，個個爭住搵食，你說錯一句話，開錯一句玩笑，對方當時笑笑口不表示什麼，但轉個頭馬上向老板/ HR 投訴的事情多的是。不少人為了顯示自己的強勢，言談間總是需要貶低他人才有安全感，上班第一天便已得罪很多同事，你要跟這種人合作做事，除了忍，別無他法，如果你刻意對抗，對方只會變本加厲。

假如你又是做金融投資有關的產業，裡面的辦公室政治比哪裡都嚴重，性格稍為溫和的人，將會成為眾矢之的，第一個被欺凌被孤立，再被開除。

你的部門，如果是Cost Centre還好，大多是朝9晚5的Routine work，雖然一世人流流長，總會遇上幾個賤人，頂多有空過來寸你兩句，平時見到面不打招呼，無故玩小圈子，當你透明。如果是Revenue Centre，大家為了爭上位，什麼骯髒手段都用上，擦鞋，說謊，出賣同事都只是基本的，跟香港比起來實在有過之而無不及，世上無淨土，加拿大也不會是天堂。

至於你的老板，這個不多說了，好工不如好老細，好上司永遠都是難求，放諸四海皆是，如果同事好但你老板仆街，而你公司又容許這種仆街存在，請閣下早日另謀出路。

都係果句，好公司不是沒有，但要看個人運氣，哪裡生活都有其困難之處。

到底香港還是加拿大機會多?

自從搬來多倫多工作之後，我在偶爾的機會下加入了一個Facebook group（香港人在多倫多），裡面有很多不同年代移民來加拿大的香港人。

有七十年代就來尋找機會的老華僑，八九六四時還是中學生便跟著家人移民來的中年華人，亦有在九七前後移民，後來回到香港，最後又帶著子女「再回流」加拿大的香港中產家庭，也有從沒到過加拿大，但在佔中前後對香港前景感到憂慮才「走難」來的年輕人。

Group裡最常提到的話題之一就是在加拿大找工作。

很多香港人當年回流香港，很大部份原因是因為找不到適合的工作。注意，是合適的工作，不是找不到工作。如果在唐人餐館打工或者在超市收銀(Labour工) 都算是工作，那其實加拿大還是有很多選擇，問題是並非人人願意甘心放下身段。

很多人以前在香港可能高薪厚職，以前在香港有一堆下屬被他管，但來到加拿大只能被人管，職位低幾級，落差太大，又或者假假地算是一個白領／專業人士，因為語言障礙，各種文化差異，種族歧視，來了好幾年，還是沒辦法找到對口的文職，最後只好帶著年幼的孩子回去。

所以我小時候在香港認識過一些同學，他們雖然在加拿大出生，但從來都沒有在這邊讀書或生活，直至大學才回去，就是因為父母當年覺得香港機會較多，不想留加，如果想要外國身份，還是送下一代出國讀書比較容易，自己留在家鄉拼事業就夠。

言歸正傳，Facebook 裡面有很多人覺得反而香港機會少，加拿大機會多。我覺得很視乎以下因素：

(一)   你的行業

(二)   你的年紀

(三)  你的英文水平／文化融入程度

搞IT 的，來加拿大（包括美國），機會和薪水肯定比香港多，Workload也比香港少 。

做金融投資的，大多想回香港，加拿大的市場基本上比較靜，當地做BIG 4 的人可能連IPO 都沒聽過，有群友在溫哥華中小學畢業，多倫多大學讀金融，在加拿大找了很久都找不到 i-Bank工作，最後要南下美國華爾街才得到一個機會，然後內部申請調派回香港分部，從此除了探親以外不再回加拿大，事關對他來講，加拿大機會「少」。

做藍領工作，通渠、裝修、洗衣機／冷氣維修，可以考慮來加拿大，當地非常缺人，入行者大多收入甚豐，我認識一個師父六十多歲，幫人修理水喉，一個月接三個CASE，已經夠生活，每年還有閒錢去南美渡假。

加拿大職場有一個好處是沒有年齡歧視，或者是不能有年齡歧視，原因是他們非常著重私隱，而且為了保障就業公平，見工面試時僱主不能問你年紀，婚姻狀況，生育意願，宗教背景，拿什麼VISA（當然他們有辦法旁敲側擊地推測真實狀況）但普遍來說，你在CV 上面想寫什麼就寫什麼，即使不顯示畢業年份，僱主也不會特別在意，只會問你有關技能和經驗的問題。

即使年紀較大，四十以上，仍然可以和剛畢業的Fresh graduate 一樣得到Entry level position 的工作機會，公司沒有人會白眼你，我曾經有大媽同事一直做Receptionist，直至五十歲才轉到一個會計職位，最後還升了職。不同於香港，年紀大了再轉行，很多時公司未必願意接受。

至於英文水平，很簡單，英文越好，愈能融入主流，當然機會愈多，加拿大的公司等著你，可是如果英文非常一般，甚至沒法和當地人溝通，則只能留在華人圈子找工作，自然認為返香港較好。

我個人認為以上因素的影響次序如下：

行業＞英文水平／融入主流程度＞年紀

意思即是行業機會愈多，英文水平愈好、愈能融入主流的人，愈傾向留在加拿大發展。

不過當然還有其他影響因素，又要看是哪種行業，想到再討論。