刻薄人的說話技巧

尖酸刻薄的人說話有以下的特徵：

你說喜歡A，他會說A 不好，或者把A和負面事物聯繫上來，縱然你不明白兩者有什麼關係。

背後欠邏輯，欠理據，毫無說服力，重點就是為了攻擊你。

例子一：你喜歡打藍球，他會說只有Gay佬才喜歡打藍球。（Gay佬有什麼問題?)

例子二：你喜歡吃日本菜，他會說日本菜很難吃，不是給人類吃。(日本人不是人?)

例子三：你買了一件東西，明明只是幾十塊錢，他硬說你買貴了，但是他本人明明也不知道市場價格。

重點不在於你買的東西是否真的太貴，只在於他要說你的東西不好，藉此說你不好。

一個人看你不順眼，你做的所有事都是錯的。

例子四：你提起最近生活遇上什麼難題，他最喜歡說這個世界就是這樣，適應不到是你的問題，你不應該抱怨，Shut down the communication。

他們最喜歡落井下石，把優越感建立於別人的痛苦上，所以千萬不要跟刻薄人說你的心底話，最好保持距離，慢慢疏遠。

然而，當他們抱怨的時候，又會要求你耐心聆聽，這時侯如果你中計了，以為說一些好話去安慰他，大家關係會更好，他們反而會給你負面回應。

例子五：

當他投訴去銀行辦事時，遇到一個態度很爛的職員。
你說：對啊，這個人就是沒禮貌。
他會否定你：不是沒禮貌，就是態度差而已！
你說：對啊，我明白你的感受，很多人就是態度差啊！
他會說，不是很多人，就是他一個而已。
你說：我朋友也遇到很多這種人，他們也不喜歡那銀行的職員。
他說：我沒有不喜歡，不要把我跟你的朋友比較。

所以你說A，他說不對，你說-A，他也說不對，原因是他要否定你而已。

另外，刻薄的人通常都自尊心重，又會產生以下行為：

如果你想了解他的觀點，即使只是以事論事，他都會視為挑戰和質疑，不斷迴避你的問題。

例子一：他說自己只會做短線投資，你問他不怕風險高嗎?你有沒有想過長線投資法，平均成本法？

他不會答你短線投資有什麼好，為什麼他要選這種策略，為什麼不怕風險，為什麼覺得長線投資不好。

他只會答：我不喜歡長線投資，我從來只會選擇短線投資。—＞不解釋，重覆自己的觀點

你回應：那麼你怎樣解決風險問題？你怎樣知道什麼時候賣掉股票？—＞你再追問

他會答：你總會知道什麼時候賣掉你的股票啊，這樣自然能賺錢啊。—＞繼續逃避，講左等於無講

是的，如果你什麼都知道，你為什麼還是在打工呢？你應該早就發達發過李嘉誠。

他們表面上維持了自己的自尊，但明眼人都知道他根本不懂。

真正有料子的人是不會介意討論，他們很自然會把觀點，理據和事實擺上來，展示給大家看他的成果，因為他們熱衷於自己的知識，希望找到同好者分享。

車迷一說起汽車，滔滔不絕，說上三小時。

球迷一說起足球，急不及待談論哪一支球隊打得好，打得差。

哪有人會討厭談論自己喜歡而又了解的事物？

只有一種情例外，就是他們腦裡根本沒有相關知識儲備，所以只好左閃右避，人云亦云。同時他們非常在意自尊，不可以跟你說他不懂。

跟這種人聊天，你會發現他們愛擺顯，而且膚淺，只敢說一些人人都知，但其實沒什麼用的大道理。你再追問下去，他們總是說不出個所然。

無奈的是，膚淺，自我中心，自尊心重，尖酸刻薄，出現在同一個人身上的機率非常高。

跟他們交談完全是浪費人生。

多倫多的Mean人(二)

在外國大城市生活的人對彼此的信任度都不高，直情可以說低於香港很多。

有時發生一件事，對方第一步不是先跟你溝通，去澄清中間可能有什麼誤會，而是不加思索地用最壞的角度去解讀你的行為，然後用最誇張的方法去攻擊對方。

事件一）

試過有一排我發高燒，咳到係辦公室人人都聽到，每一分鐘我都咳一次，我於是同老板請假，但因為氣管發炎，咳左兩星期都未好，所以要再同老板請多一日假，佢開始覺得我係想呃病假，但明明佢都聽到我咳得辛苦（後尾我真係咳左兩個月先好返），唔知點解佢下意識就覺得我講大話，對我態度開始差。

我的部門工作量不算多，在香港我一個人做三個人既野，係呢邊，我覺得係一個人既野分左比三個人做，所以我從來都無話做唔哂野，甚至一星期有大部份時間我都係上網睇高登連登，因為好多野佢預我要用一個月搞惦，我用一星期就做起，其他野我唔敢講，但香港人工作效率真係世界聞名，所以其實我請多一兩日病假，都唔會影響到任何事，況且我真係病。

後來我先知，呢度好多人詐病唔返工，詐到離哂譜，加上加拿大高度重視私隱，所以唔可以要求對方比醫生紙，連病因都唔可以問，所以要講大話真係比香港容易，香港起碼都要去診所比幾百蚊拎醫生紙啊，呢邊係屋企發個電郵就算。

之但係，如果你都見住個員工係辦公室咳到氣喘，你懷疑對方又有咩用？我返到黎係咁咳都唔會有咩生產力。

好明顯我前老板已經比大量不誠實的員工嚇怕左，然後產生非理性行為，乜都質疑左先。

事件二）

試過我要同IT部門溝通，平時搵開果位員工咁岩放左假，我唯有走去問另一位高級少少既同事，因為果排公司網路系統有問題，所以我無辦法同係美國既同事溝通，又一定要搵IT 部門既人先可以Remote檢查到果邊既辦公室電腦系統係咩情況，於是我本著好好禮貌既態度去問果個IT 人應該點做，問到第二次，佢突然發脾氣，講一大堆野寸我，後來先知唔係我問題，仲要比CEO新請返黎既Director係電話聽到，對方嬲到震，即刻Send左個電郵比我老板，叫佢搞惦呢壇野。

後來我諗諗下，應該係呢位同事下意識係以為我玩9佢，所以一黎就用一種勁惡劣既態度去同我溝通，所以無耐我就完全無視呢個人，行出行入都唔同佢打招呼，因為佢既行為唔值得我的尊敬，佢反而又無啦啦一副好驚既樣。

我唔明白，你發得我脾氣，預左架啦。難道你咁樣寸完人，仲奢望我會同你講野？可唔可以唔好咁好笑？

有事唔係正正經經拎出來講清楚，而係咁樣發脾氣，唔知係咪我好彩，我係香港好少經歷呢樣野。係香港呢，所有Rules 都已經定好哂，大家跟住做就係，就算有幾唔鐘意，都好少咁樣發人脾氣，你要指責人，就必須要有理有據，但唔知點解呢度Ｄ人唔洗，只要夠粗魯刻薄就得。

就算我以前在魁省上班，都沒試過有這樣的情況發生。

我一直諗唔明點解呢度既人咁奇怪，以為這只是我的公司問題，直至我遇到愈來愈多人，再同其他中國香港黎既移民傾開，問他們在其他機構上班的情形，先發現係呢邊文化既一種。

事件三）

一位華人竹昇同事明明間中都同我食Lunch，仲介紹朋友給我認識，我一直對佢都好客氣好有禮貌，亦從來無要求過佢為我做任何野，但有一日涉及到安排工作時，因為我隻手傷左，我用內部通訊用text message佢（他與我並不坐在一個房間，所以他當日並沒看見我），話要遲一日先幫佢整理公司既舊檔案，比埋時間日期，問佢接不接受，事實上那些檔案是長年沒有人用，他也不會用，只需要有人幫他放好，而我任職於管理信息的部門，所以他會跟我溝通。

佢竟然可以即刻話：你隻手傷左仲可以同我打字？
我：點解唔打得？
佢：你咁講，我隻手都傷左。
我開始嬲，打左一句：咁你用腳打字囉。
佢：你示範我睇。

後來我好嬲，去到佢辦公室，問佢，係咪而家要檔案？！係的話，我地而家拎。

佢見到我隻手真係扎著繃帶，先知道誤會左我。

其實我唔介意你同我講呢件事對你來講有咩重要性，點解你一定要今日做，如果真係好急，我會安排另一位同事幫手。

但係，你走去質疑我話自己隻手受傷係一個謊言，果一刻我覺得好嘔心。

當你以為同一個人熟到某個地步，先發現因為一件關係到佢利益既小事，對方就即刻懷疑你，你先知原來相處左咁耐，大家係無信任基礎，而所謂利益，亦只係對方願不願意在你安排的時間來幫你處理文件，而唔係任何急事，或者重大的工作項目。而幫你做左呢樣野，係咪會幫你升到職加到人工？唔會，只係幫佢慳左少少時間。

我無法想像，有一個地方既人可以短視計較到咁。為左慳兩個鐘頭，犧牲一段關係。

機關算盡，只係想利用你為他做一些自己不想做的雜務，所以你只要有自身的考慮，不是做100%符合他利益的事，都會引起對方的懷疑，因為他們自己本身就是一個靠欺騙他人來達到目的既人，難怪也沒法信任誰。

信任是雙方的，你懂算計，別人也會，即使對方明明沒有想欺騙你的意思，但因為你的種種懷疑，也令他變得開始對你有所警惕，你會認為他真的是有欺騙你的可能性，於是大家開展了一段虛假的關係，即是心理學所說的自我預言 (Self fulfilling Prophecy)

然後到談利益時，他們就說大家是朋友，你要幫忙。
到你認為大家是朋友時，他會開始跟你談利益。

我不是說大家不能談利益，成年人的世界，互相利用是常事，但是我感覺他為人太過短視，很容易為一點利益出賣他人，和這種人相處，你注定只有吃虧，分分鐘你為他付出完之後，仍然一無所得，而對方則利用你想要的東西和弱點去繼續操控你。

可惜他不明白，我看一個人是看對方的Integrity，還有他本身的格局。

他的小把戲，套用大陸人的用語，就像是一個跳樑小丑，在台下的我都看得一清二楚，所以在辭職後，即使他仍然跟我假裝友好，我都不再和他聯絡。

注意：呢個人係ESTP，我係INFP，大家都係P型人，唔會迫到人太盡，所以就算唔妥大家，都唔會撕破面子，但好明顯我和他的價值觀完全相反。

多倫多的Mean人(一)

住左係多倫多咁耐，發覺有一樣野就係，有好多人好Mean，係由內到外，不分種族果種Mean (唔好諗住華人就會好好多，受到同化的華人多的是），唔知係咪由細到大都生存係一個極度不友善的環境，佢地好精於搵位寸人，鬧人，尖酸刻薄，想盡辦法令你唔舒服，睇唔起人。

好耐以前有個Red Neck白人後生仔問我之前午飯食乜，我答Chicken Burger，佢會答，You know，I will never eat chicken burger, because it sounds like high school food for me.

其實我唔明點解佢會諗得到Chicken Burger 會同High School 有關係，基本上好多人都食呢種食物，邏輯上係扯唔埋，但係佢可能只想串我個樣後生，同High School student 無分別，但其實我比眼前呢個人年長十年。當然，Red Neck係唔用腦思考既，從來都只係一群睇表面的生物，所以佢地見到乜就會講乜，唔會諗自己講既野岩定錯。我在魁省讀碩士時，半隻這樣的生物都沒遇過，人人政治正確，有禮貌到嚇親，黎左安省做野之後，先見識到原來加拿大的人口質素如何參差。

我係香港又真係無遇過呢種人，寸既人唔係無，但唔會係呢Ｄ無關痛癢的地方上面寸，比人感覺質素太低。我時刻都覺得自己好似同緊一班小學生共事，要將自己拉低到佢地個水平思考，為左Ｄ白痴無謂野同對方爭論，浪費我既時間。但當地人好多就係咁既質素，Red Neck 的數目多不勝數，基本上十個有六個都係呢種人，所以我唔明點解香港人咁崇洋。

呢個白人後生仔好搞笑，佢好鐘意周圍睇唔起人，但自己又無咩本事，讀完高中，College Engineering 畢業，這是一個非常有需求的行業，而他的朋友都有Offer，但只有佢一直都搵唔到相關既工做 (係佢自己親口講)，好彩佢老母離婚後嫁左個律師，而佢Stepfather係我前公司既法律部門做到好大粒(算係CEO的老友記)，所以佢一開聲，搭上搭，請左佢入黎做打雜，幫IT部門拉下線，裝下電腦，聽下電話，由最低工資開始做起，佢做左兩年，Keep住搵工，中間都有面試，包括佢表哥都介紹，照計成功率會高好多，咩銀行，咩大公司，但係次次都見唔成功，直至我辭職後，都依然留返係度做，如果唔係靠後父，都唔知佢而家係咪仲匿係屋企量緊地。

從我地第一次見佢開始，佢已經係Socially Awkward，唔識同人溝通，唔會同人打招呼，跟住其他部門經理教佢野，次次對方未講完，佢為左表現到自己好醒目，就會不斷問問題，打斷人地，最後搞到個經理唔想理佢，寧願自己做返。

同時佢一開口就得罪人，試過當住我地成班Chinese 同事面前講起煮食用具，然後話佢唔會買中國製造既鑊，因為All Chinese stuff are cheap，我和同事你眼望我眼，唔知佢有心定無意，但好明顯佢真係好唔Culturally Sensitive，如果有人扯到去種族歧視，佢就大鑊。

又試過我直行直過無視佢，當佢無到，佢會嚇到鳩縮，之後又好聲好氣同我打招呼，我都唔明佢想點。由你開口寸人果刻開始，我都唔會預你想同我建立關係，咁我唔理你又有咩問題呢？但唔知點解佢又會心裡淆底，驚到震咁問我How are you?  連佢上司都係咁，兩個都係Red Neck，我實在摸不著頭腦。到你同佢打返招呼，佢又開始佢既冷漠Mode，如是者來來回回，我無咩耐性，乾脆全部經過都扮見唔到。

其實你唔在乎人，人地就自然唔會在乎你，好正常。你連對人既基本尊重都無，人地點解要采你？

講起種族歧視，有人話，你好難介定咩為之歧視，有時你都唔太肯定，又驚殺錯良民。

其實，呢樣野無咩明顯既分界線。

只要果個人講野令你唔舒服，你就可以投訴，行埋去DIU佢。

你大可以話，what do you mean by XXXX? Are you being racist?

或者同HR講，Last time Person A said XXXX to me, I do not know what he means, but it made me really feel uncomfortable and associate it with my cultural background and my race.

重點不在於對方說什麼，而是他說的話令你如何聯想到你的文化背景，而又包含了負面意思。

就算最後比人話你過份敏感，都唔緊要，有殺錯無放過，正係北美的生存之道啊。

比起會殺人的人，他們寧願得罪唔出聲既人。

因為呢邊始終係強盜文化，華人果套果套謙謙君子都係留返係儒家文化圈使用，外族係唔會識欣賞。

兩年來的經驗，令我對人的期望降低左好多，只要有人一埋來我身，我第一件事唔係諗佢會有禮貌地同我建立關係，而係諗佢又想點玩野，我都驚我再住多幾年會變成呢種人。

如果對方竟然好親切有禮貌，我會讚嘆呢個人真係稀有生物，遇到既機率同中六合彩無咩分別。